Jas oryndaýshylardyń respýblıkalyq baıqaýy bastaldy

Eki jylda bir ret ótkiziletin respýblıkalyq baıqaýdy QR Bilim jáne ǵylym mınıstrligi men Qazaq ulttyq óner ýnıversıteti birlese uıymdastyryp otyr.

Baıqaýdyń maqsaty - bilim alýshylardyń kásibı daıarlyǵyn arttyrý men daryndy oryndaýshylardy anyqtaý arqyly olardyń talabyn shyńdaý jáne Qazaqstannyń ónerin nasıhattaý.

«Sharanyń tárbıelik máni zor dep bilem. Shákirtterdi mýzyka ónerine baýlý, áýenmen beınelenetin tereń tebirenis tolqynyn túısikpen, júrekpen túsine bilýdi úıretý balanyń rýhanı álemin baıytýdyń bir joly bolmaq. Mýzyka ónerin meńgergen adam ózge salalarǵa da beıimdelgish keledi, sondyqtan onyń tálim-tárbılik, rýhanı mańyzy zor», - dedi qazylar alqasynyń ókili, Qaraǵandydaǵy Táttimbet atyndaǵy kolledj oqytýshysy Irına Bosına jýrnalısterge bergen suhbatynda.

Bıylǵy baıqaý Astana men Almaty qalalarynda ótpek. Baıqaý «Án aıtý», «Mýzyka teorııasy» mamandyqtary boıynsha P.Chaıkovskıı atyndaǵy Almaty mýzykalyq kolledjinde, aspapta oryndaý mamandyqtary boıynsha «fortepıano», «skrıpka», «alt», «vıolonchel» atalymdaryna sáıkes Astana qalasynda Qazaq ulttyq óner ýnıversıtetinde bolady.

Úsh aınalymnan turatyn óner dodasynda Qazaqstannyń barlyq aımaqtarynan kelgen 42 úmitker baq synaspaq.

Óner baıqaýy 31 naýryzǵa deıin jalǵasady.