Jas órt sóndirýshilerdiń halyqaralyq sleti Oralda ótedi (FOTO)
ORAL. QazAqparat - Qazaqstan, Reseı jáne Germanııa elderi jas órt sóndirýshileriniń ІІІ halyqaralyq sleti bıyl jazda Oralda ótedi. Bul týraly osy úsh el ókilderiniń qatysýymen Oraldaǵy Dostyq úıinde ótkizilgen úsh jaqty jumys kezdesýinde aıtyldy.
BQO TJ departamentiniń baspasóz qyzmetinen habarlaǵanyndaı, sletke daıyndyq máselesi pysyqtalǵan kezdesýde atalyp ótilgenindeı, mundaǵy basty maqsat - balalardyń boıynda qaýipsizdik mádenıetin tárbıeleý, órt sóndirýshi-qutqarýshy mamandyǵynyń bedelin arttyrý, jumys tájirıbelerimen almasý bolyp tabylady.
Úsh jaqty jas qutqarýshylar sletin ótkizý jóninde BQO TJ departamenti delegatsııasy Saratov oblysy memlekettik órt qadaǵalaý qyzmetiniń 85 jyldyǵyn merekeleý kezinde bastama kótergen bolatyn. Bul ıdeıa - úsh eldiń memlekettik órt sóndirý qyzmetteri tarapynan qoldaý taýyp, 2014 jyly Germanııadaǵy Gessen jeri Jas órt sóndirýshileri qaýymdastyǵynyń shaqyrýymen Oral qalasy jas órt sóndirýshileriniń qurama komandasy Bergshtrass qalasynda ótken halyqaralyq sletke qatysty. Bul Saratov, Oral qalalary jáne Gessen jeri jas órt sóndirýshileriniń alǵashqy úsh jaqty sleti edi. Sosyn ol 2015 jyly Saratovta jalǵasyn tapty.
Kezdesýde Qazaqstan halqy BQO assambleıasy tóraǵasynyń orynbasary Ǵaısa Qapaqov, Oral qalasy ákiminiń orynbasary Ǵalym Orynǵalıev, BQO TJ departamentiniń bastyǵy Marat Kúldikov, Reseı TJM Saratov oblysy boıynsha bas basqarmasy zań bólimi bastyǵynyń orynbasary Vladımır Serebrıakov jáne Germanııa eliniń ókilderi Klaýs Shplıdorf pen Sergeı Golod mundaı halyqaralyq sharany ótkizýdiń mańyzy zor ekendigin atap ótip, óz usynys-pikirlerimen bólisti. Olardyń sózderinen málim bolǵanyndaı, órt sóndirýdi uıymdastyrýda úsh elde ózgeshelikter de joq emes. Mysaly, Qazaqstan men Reseıde órtke qarsy qyzmet Іshki ister jáne TJ mınıstrlikteri quramyna kiretin kásibı uıym bolsa, Germanııada sonymen qatar erikti órt sóndirý qyzmeti keńinen taralǵan. Ásirese, shaǵyn qalalarda órt bola qalǵan jaǵdaıda sol mańdaǵy adamdar dereý órt sóndirýge kirisedi. Bul elde erikti órt sóndirýshi bolý óte bedeldi.
Kezdesý barysynda úsh eldiń qoǵamdyq uıymdary arasynda memorandýmǵa qol qoıý jaıy da talqylandy. Sodan keıin meımandar Dostyq úıindegi etnomádenı birlestikter jumysymen tanysyp, sondaı-aq qutqarýshylar polıgony men órt sóndirý bóliminde, órt-tehnıkalyq ortalyǵynda boldy.
