«Jas órken» syılyǵy elimizdegi eń daryndy balalarǵa beriledi
ASTANA. QazAqparat - Elimizdegi eń daryndy balalardy anyqtaýǵa arnalǵan «Jas órken» syılyǵy boıynsha búgin daýys berýdiń alǵashqy kezeńi bastalady, dep habarlaıdy QazAqparat tilshisi.
«Jas órken» syılyǵynyń ıelerin anyqtaý jumysy ótken aıda bastalyp ketken bolatyn. Áleýmettik jeli qoldanýshylary men qoǵamdyq uıymdar syılyqtyń jarııalanǵanyn estip, birden óz úmitkerlerin usyna bastaǵan. «Respýblıka-Aımaq-Damý» qoǵamdyq qorynyń prezıdenti Ǵalym Baıtoq atap bergendeı, «Jas zertteýshi», «Jas daryn», «Jas tolaǵaı», «Jas patrıot», «Jas ekolog», «Jas qanat», «Jas bıshi», «Jas qalam», «Jas bloger», «Úzdik erikti» «Jas aqyn», «Jas sýretshi», «Jas mýzykant» nomınatsııalary boıynsha Qazaqstandaǵy óz qatarynan ozyq balalar anyqtalady.
«Elimizde daryndy jas balalar óte kóp. Máselen, Reseıdegi «Golos. Detı» shoýynyń juldyzy Erjan Maksımdi alyp qarańyz. Sonymen birge, ǵylymı jumystarmen aınalysyp jatqan, sóz ónerimen jáne aqyndyǵymen tanylǵan nemese bireýdi qutqaryp alǵan balalar da az emes. Erikti órender jeterlik. 300-ge tarta ótinim kelip tústi. Bul syılyq - «Jyl adamy», «Halyq súıiktisi» syılyqtaryna uqsaıdy. Tek bul baıqaýda biz mektep jasyndaǵy balalardy tańdap alamyz. Sharany tuńǵysh ret uıymdastyryp otyrmyz. Bul syılyqtyń taǵy bir ereksheligi - daýys berý. Áleýmettik jelide daýys berý ashyq júrgiziledi. Respýblıkalyq deńgeıdegi bul syılyqqa tek Tarazdan ǵana úmitker usynylǵan joq. Al qalǵan oblystardyń barlyǵynan daryndy balalar qatysady», - deıdi Ǵalym Baıtoq.
Áleýmettik jelide daýys berýdiń alǵashqy kezeńi búgin, ıaǵnı 12 naýryz kúni saǵat 22.00-de bastalady. Facebook jelisindegi «Halyq súıiktisi» (Narodnyı lıýbımets) tobynda daýys berý 31 naýryzǵa deıin jalǵasady. Al ekinshi kezeńdegi daýys berý 5-15 sáýir aralyǵynda lubimec.kz saıtynda júrgiziledi.
«Biz tuńǵysh ret osyndaı respýblıkalyq deńgeıdegi syılyqty óńirde ótkizetin boldyq. Atap aıtqanda, osy baıqaýdyń uıymdastyrylatynyn estigen Qostanaı oblysy úlken qyzyǵýshylyq tanytty. «Qostanaı daryny» aımaqtyq ǵylymı-praktıkalyq ortalyǵy men «Respýblıka-Aımaq-Damý» qoǵamdyq qory baıqaýdyń fınalyn Qostanaıda ótkizedi», - deıdi Ǵalym Baıtoq.
