«Jas Órken» baıqaýy bıyl da jalǵasyn tabady
NUR-SULTAN. QazAqparat – «Respýblıka-Aımaq-Damý» qoǵamdyq qorynyń prezıdenti Ǵalym Baıtoq «Jas Órken» respýblıkalyq balalar syılyǵy daryndy balalarǵa bıyl da beriletinin jarııalady, dep habarlaıdy QazAqparat tilshisi.
Ǵalym Baıtoq ótken jyly áleýmettik-mádenı ómirdiń san salasyndaǵy daryndy balalardy anyqtaý maqsatynda Qazaqstanda tuńǵysh ret biregeı balalar konkýrsyn ótkizilgenin eske saldy. Onyń jazýynsha, «Jas Órken» respýblıkalyq balalar syılyǵy Qazaqstandaǵy Jastar jylyna oraı uıymdastyrylyp, Syılyqtyń 14 nomınatsııa boıynsha laýreaty anyqtalǵan. Baıqaýdyń bas júldesin jas ánshi, 2019 jylǵy balalar Eýrovıdenıesiniń jeńimpazy Erjan Maksım jeńip alǵan edi.
«Ótken jyly jeńimpazdardy marapattaýdy Qostanaı qalasynda ótkizdik. Bizge «Qostanaı daryny» aımaqtyq ǵylymı-praktıkalyq ortalyǵy qoldaý kórsetken bolatyn. Sonymen qatar, Qostanaı oblysynyń jergilikti atqarýshy organy men jergilikti kásipkerler de kómek qolyn sozǵan. Bıyl biz osy dástúrdi jalǵastyryp, dál sol Qostanaıda laýreattardy marapattaý rásimin ótkizýdi jón dep sheshtik», - dep jazady Ǵalym Baıtoq facebook paraqshasynda.
2020 jyldyń 1-8 naýryzy aralyǵynda alǵashqy, ıaǵnı baıqaý úmitkerlerin qabyldaý kezeńi bastalady. 15-22 naýryz aralyǵynda Facebook-te daýys berý arqyly ekinshi kezeń ótedi. 29 naýryzdan 12 sáýirge deıin aqtyq daýys berý lubimec.kz saıtynda jalǵasady. Laýreattardy marapattaý rásimi 2020 jyldyń mamyr aıynyń basynda uıymdastyrylady.
«Demeýshilerge atsalysýǵa shaqyramyz. Syılyqtar amerıkalyq «Oskar» kınosyılyǵynyń tájirıbesi negizinde tabystalady», - deıdi ol.
