Jas ónertapqyshtar jerasty avtoturaqtaryn iske asyrýdy usynady
«Biz Batys Qazaqstan oblysy Oral qalasyndaǵy respýblıkalyq joǵary tehnıkalyq kolledjiniń birinshi kýrs stýdentterimiz. Aty-jónim Nargız Baqytjanova, janymdaǵy kýrstasymnyń esimi Demeý Mıras. Bizdiń daıyndaǵan jobamyz - qazavtoturaq dep atalady. ıAǵnı, bul - jerasty avtoturaǵy. Jobany jasaýǵa belgili bir problemalardyń túrtki bolǵanyn atap ótkim keledi. Kólikterdiń kóptigi, turaqtardyń jetispeýshiligi, kólik apattarynyń kóbeıýi, turaqta turǵan kólik saımandarynyń, bólshekteriniń urlanýy, sonymen qatar balalarǵa qatysty jol-kólik oqıǵasy máseleleriniń bary belgili. Ózimizdiń jobamyz arqyly problemalardyń sheshimin taba alamyz», - dedi QazAqparat tilshisine Nargız Baqytjanova elordadaǵy Nazarbaev Ortalyǵynda robototehnıka boıynsha ótip jatqan «KazRoboProject-2019» respýbıkalyq ǵylymı-tehnıkalyq jobalar baıqaýynda.
Jas ónertapqyshtyń aıtýyna qaraǵanda, qazavtoturaq arqyly kólikterdi qaýipsiz jerge ornalastyrýǵa bolady. Joba kólikterdiń ury-qarydan qaýipsizdigin qamtamasyz etedi. Bastysy, kólikter balalar oınaıtyn aýlada turmaıtyn bolady.
Qazavtoturaq jobasy arqyly ónertapqyshtar úlken lıft quralpy qurylǵymen kólikti jer astyndaǵy sórelerge ornalastyrýdy kózdeıdi. Nargız Baqytjanovanyń aıtýyna qaraǵanda, avtoturaqtyń úlkendigi kólikterdiń suranysyna qaraı ornalastyrylady. Jastardyń sózinshe, dál osy bir ǵana qazavtoturaqqa elýge deıin kólikti ornalastyrýǵa bolady.
«Tokıo men Reseıdiń birneshe qalasynda dál osyndaı qozǵalmaly avtoturaqtar barshylyq. Eger is júzinde bul jobany júzege asyratyn bolsaq, jańadan salynyp jatqan úılerdiń janynan salýǵa ábden bolady. Úıdi salatyn qurylys kompanııalarymen birge jumys júrgizgimiz keledi. Sebebi, daıyn úıdiń nemese saýda ortalyǵynyń janynan salý úshin arnaıy oryn kerek bolady», - deıdi Nargız Baqytjanova.
Jas ónertapqyshtardan jobany iske asyrý úshin qansha qarajattyń kerektigin surap kórdik. Olardyń aıtýynsha, dál osyndaı bir qazavtoturaqqa 11 mln teńge ábden jetkilikti.
