Jas oqyrmandardyń kitapqa degen qyzyǵýshylyǵyn oıatý barsha qoǵamnyń isi - A. Sádýaqasova

ASTANA. QazAqparat - Bul týraly búgin Ortalyq kommýnıkatsııalar qyzmetinde "Balalar ádebıeti - polımádenıetti qazaqstandyq qoǵamdaǵy tulǵalardyń rýhanı-adamgershiligin damytý negizi retinde" taqyrybynda ótken brıfıng barysynda QR Prezıdenti janyndaǵy Memlekettik basqarý akademııasynyń Ortalyq Azııa óńirindegi etnosaralyq jáne konfessııaaralyq qatynastardy zertteý ortalyǵynyń jetekshisi, Qazaqstan halqy Assambleıasy Ǵylymı-sarapshylyq keńesi tóraǵasynyń orynbasary, áleýmettaný ǵylymdarynyń doktory Aıgúl Sádýaqasova aıtty.

"Búginde Qazaqstan halqy Assambleıasy Ǵylymı sarapshylyq keńesi birneshe ǵylymı jobalardy iske asyryp otyr. Sol jobalardyń arasynda qyzyqty ári qoǵamǵa kerekti taqyryp - balalar ádebıetine arnalǵan joba. Qazir zaman ózgerdi, adam ózgerdi, qoǵam ózgerdi deımiz. Sondyqtan, árıne, balalardyń qyzyǵýshylyǵy da ózgerdi. Balalardyń kitapqa degen qyzyǵýshylyǵyn oıatý, olardyń qoǵamdaǵy qundylyqtardy kitap arqyly tanýy da ekitalaı bolyp qaldy. Elbasy bir suhbatynda "Bolashaqta kitap oqıtyn azamattar kompıýter qaraǵan azamattardy basqarady" degen edi. Óte dál aıtylǵan sóz. Osy bastama jalpy, balalar ádebıetin zertteýge arnalǵan. Qazir balalarǵa san-alýan ádebıet bar. Biraq, kóbinese olar elektrondy júıede jáne ınternette ornalasqan. Sondyqtan, qazirgi balalardyń tańdaý erkindigi kóp. Biz Qazaqstan halqy Assambleıasynyń negizgi qaǵıdattaryn bile otyryp, jalpy, jastarǵa halqymyzdyń qundylyqtaryn daryta biliýimiz kerek. Osy rette, kitapqa degen súıispenshilikti qalaı oıatý kerek, burynnan kele jatqan ańyzdar men ertegiler balalarymyzdyń sana-sezimine enip, sol arqyly dástúrimiz qalaı jalǵasyn tabýy kerek degen máseleler týyndaıdy. Osy suraqtarǵa jaýap berý úshin bizdiń ǵalymdar toby zertteý júrgizgen edi", - dep atap ótti ol. A. Sádýaqasovanyń aıtýynsha, ǵylymı-sarapshylyq keńes balalardyń ertegilerdi qabyldaý máseleleri boıynsha psıholıngvıstıka, etnolıngvıstıka aspektilerinde zertteýler júrgizip, qazaqstandyq ádebıet naryǵyna taldaý jasaǵan. Sondaı-aq "Qazaqstandaǵy balalar ádebıeti: talqylaýdan sheshimderge deıin" ǵylymı monografııasynyń kontseptsııasy qurastyryldy. "Jalpy, jas oqyrmandardyń qyzyǵýshylyǵyn oıatý tek memlekettik organdardyń, múddeli organdardyń mindeti emes. Ol - qoǵam bolyp, ata-ana, ata-áje bolyp jasaıtyn is. Sondyqtan, myna jobanyń basty qaǵıdasy - "birge oqyp, birge sýret salamyz" degen maǵynada. ıAǵnı, balany ata-anasymen birge kitap oqýǵa daǵdylandyrý qajet. Buny kúndelikti daǵdyǵa aınaldyrsaq, óz balamyzǵa, óz urpaǵymyzǵa oı salamyz. Sondyqtan, jobaǵa tek qana mamandar, tek qana balalar qatysady degen sóz emes. Basqa da áleýtettik toptar oǵan tartylýy kerek", - dep túsindirdi A. Sádýaqasova.