Jas ofıtserler qarjy polıtsııasy men keden organdarynyń qataryn tolyqtyrdy
ASTANA. Maýsymnyń 22-si. QazAqparat - Elimizdiń qarjy polıtsııasy men keden organdarynyń qataryn Qarjy polıtsııasy akademııasyn bitirgen 100-den astam jas qyzmetker tolyqtyrdy.
Bul aqparatty QR Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmeti taratyp otyr.
Atalǵan agenttiktiń habarlaýynsha, maýsymnyń 19-y kúni tyńdaýshylarǵa «Quqyq qorǵaý qyzmeti», «Keden qyzmeti» mamandyqtary boıynsha dıplomdar men erekshe úlgidegi úzdik dıplomdardy QR Ekonomıkalyq qylmysqa jáne sybaılas jemqorlyqqa qarsy kúres agenttigi tóraǵasynyń orynbasary A.Lýkın saltanatty jaǵdaıda tapsyrǵan.
Qarjy polıtsııasy akademııasy óziniń 11 jyldyq tarıhynda memlekettiń bilim berý deńgeıindegi ustanymen nyǵaıtyp, memlekettiń quqyq qorǵaý vedomstvolary (qarjy polıtsııasy, keden organdary, Ulttyq qaýipsizdik komıteti) úshin mamandar daıarlaıtyn birden bir joǵary oqý orny bolyp tabylatynyn dáleldedi. Sonymen birge, Qarjy polıtsııasy akademııasy Qazaqstannyń, sondaı-aq TMD elderiniń bilim berý úrdisinde quqyq qorǵaý júıesiniń mamandandyrylǵan joǵary oqý oryndary arasyndaǵy eń aıtýly jáne bedeldi bilim oshaǵy ekendigin kórsete bildi.
Qysqa merzimniń ishinde Qarjy polıtsııasy akademııasynda zamanaýı materıaldyq-tehnıkalyq baza quryldy. Zań ǵylymynyń jáne quqyqtyq bilim berýdiń damýyna úles qosa otyryp, ǵylym men quqyq qoldaný tájirıbesiniń baılanysyn nyǵaıtatyn biliktiligi joǵary professorlyq-oqytýshylyq quramdy qalyptastyra aldy. Akademııa qyzmetkerleri men tyńdaýshylary ǵylymı konferentsııalarǵa belsene qatysady, ekonomıka salasyndaǵy qylmystardyń aldyn alý jáne tergeý boıynsha ádistemelik usynymdar jasaıdy.
