Jas metallýrg Qazaqstan jastaryn óndiriste eńbek etýge shaqyrdy - Jastar jyly

ASTANA. QazAqparat - Aqsý ferroqorytpa zaýytynyń metall qorytýshysy Aleksandr Shýtov Qazaqstan jastaryn óndiris oryndarynda jumys isteýge shaqyrdy. Onyń aıtýynsha, óndiris salasynda eń jarqyn jetistikke jetýdiń úlgisin Prezıdent óz ómirimen kórsetip otyr, dep habarlaıdy QazAqparat tilshisi.

«Men 26 jastamyn. Mamandyǵym - metallýrg. 20 jasymnan bastap Aqsý ferroqorytpa zaýytynda jumys istep kelemin. Qazirgi ýaqytta jumysta master laýazymynda eńbek etemin. Óz jumysymnyń mindettemelerinen bólek, men zaýyttyń qoǵamdyq ómirine belsene aralasyp júrmin. Jastar keńesiniń ǵylymı jumys boıynsha belsendisimin. Ártúrli ǵylymı-tehnıkalyq konferentsııalardan qalmaýǵa tyrysamyn. Sonymen birge, Pavlodar oblysynyń jastar kásipodaǵynyń múshesimin», - dedi jas metallýrg Prezıdenttiń qatysýymen ótip jatqan «Táýelsizdik urpaqtary» atty Jastar jylynyń ashylý saltanatynda.

Onyń aıtýynsha, zaýyttaǵy metallýrgterdiń kópshiligi - kreatıvti jastar. Olardyń bári de zamanǵa saı ıdeıalardyń bastamashysy bolyp otyr.

«Bul ıdeıalar óndiristi artyryp qana qoımaı, áleýmettik salada da mańyzyn kórsetip keledi. Jastar turmystyq qaldyqtardy óńdeý, aýlalardy jaqsartý, balalarǵa arnalǵan alańdardyń irgesin qalaý sekildi mańyzdy jobalardy júzege asyrýda. Peshte jumys isteý eńbekke degen súıispenshiligimdi týǵyzdy. Kásiporynda jumys istegen ýaqytta memlekettik deńgeıdegi ózgeristerge kýá bolǵanymdy aıta ketkim keledi», - deıdi Aleksandr Shýtov.

Jas metallýrg elimizdiń adal eńbek etip júrgen barsha jastarynyń atynan Memleket basshysyna alǵys aıtty.

«Sóz sońynda mamandyq tańdaý aldynda turǵan jastarǵa úndeý tastaǵym keledi. Óndiris - óz áleýetińdi tanytýdyń keremet múmkindigi. Eńbek jolyn óndiriste bastaı otyryp, kóp maqsatqa jetýge bolady. Bizdiń Prezıdent Nursultan Ábishuly osy rette bizge jarqyn úlgi bolyp tabylady», - dep túıdi sózin Aleksandr Shýtov.

Aıta ketsek, Jastar jylynyń ashylýyna Úkimet músheleri, QR Parlamenti depýtattary, jergilikti atqarýshy organ basshylary, QR Prezıdenti janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jıynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýı medıa salasynyń ókilderi, balalar úıiniń tárbıelenýshileri men túlekteri, jas áskerı qyzmetshiler kelgen.

Eske sala ketsek, QR Prezıdenti Nursultan Nazarbaev Qazaqstan halqyna bıylǵy Joldaýynda 2019 jyldy Jastar jyly dep jarııalaýdy usynǵan bolatyn.

Prezıdent óz sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıtqan bolatyn Al, arada bir aıdan astam ýaqyt ótkende Elbasy Jarlyǵymen 2019 jyl Jastar jyly dep jarııalandy.