Jas memlekettik qyzmetkerlerdi ǵylymı zertteýlerge keńinen qatystyrý kerek - B.Ábdirásilov
ASTANA. QazAqparat - QR Prezıdenti janyndaǵy Memlekettik basqarý akademııasynyń doktoranttary men magıstranttaryn memlekettik basqarý salasyndaǵy zertteýlerge belsendi qatystyrý mańyzdy.
Bul týraly búgin «Intellektýaldy kóshbasshy:Qazaqstan damýynyń jańa kezeńi» atty taqyrypta ótken halyqaralyq konferentsııada Memlekettik basqarý akademııasynyń rektory Bolatbek Ábdirásilov málim etti.
Rektordyń aıtýynsha, akademııanyń kóptegen magıstranttary men doktoranttary oqý barysymen qatar, ártúrli jumys toptaryna da belsendi qatysyp, onda zańnamalyq bastamalardy, normatıvtik-quqyqtyq qujattardy talqylaýǵa aralasady. «Meniń oıymsha, bul bizdiń magıstranttar men doktoranttardyń zor jetistigi. Óıtkeni, ǵylymı-ádistemelik qamtymdylyq bolmaı, Bes ınstıtýttyq reforma men «100 naqty qadam» Ult josparyn tıimdi júzege asyrý da múmkin emes. Sondyqtan da, jas memlekettik qyzmetkerlerdi ǵylymı zertteýlerge keńinen qatystyryp, olardy zertteý isine meılinshe tartý asa mańyzdy», - dep atap ótti B. Ábdirásilov.
Jıyn barysynda akademııa doktoranttary memlekettik basqarý salasyndaǵy ǵylymı zertteýlerdiń zamanaýı ádisteri týraly baıandamalar jasady. Sonymen qatar, Qazaqstanda aqparattyq qoǵam qurýdaǵy aqparattyq tehnologııalardyń atqaratyn róli týraly áńgime qozǵaldy.
