Jas medıtsına mamandaryn aýylda jumys isteý úshin yntalandyrý kerek – Asqar Mamın
NUR-SULTAN. QazAqparat – Aýyldarda jumys isteýge jas medıtsına mamandaryn jappaı tartý qajet. Bul týraly búgin Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.
«Memleket basshysy Qasym-Jomart Kemeluly Toqaevtyń halyqqa Joldaýynda Úkimetke medıtsınalyq alǵashqy kómekti uıymdastyrýdyń tásilderin túbegeıli qaıta qaraýdy tapsyrdy. Halyqtyń basym kópshiligine, ásirese aýyldy jerlerde mobıldilik pen qoljetimdilik asa qajet. Bul mindetter «Nur Otan» partııasynyń baǵdarlamasyn oryndaý jónindegi jol kartasynda belgilengen», - dedi Úkimet basshysy.
Sondyqtan Premer-Mınıstr alǵashqy kómekti jańartý men oǵan halyqtyń qoljetimdiligin keńeıtý boıynsha barlyq qajetti sharalardy qabyldaý kerektigin basa aıtty.
«Qazirgi ýaqytta ambýlatorııalyq emhana obektileri ǵımarattarynyń eń joǵary tozýy men eń tómen tehnıkalyq jaraqtandyrýy Aqmola, Soltústik Qazaqstan jáne Shyǵys Qazaqstan oblystarynda baıqalady. Aýyldarda jumys isteýge jas medıtsına mamandaryn jappaı tartý, olardy yntalandyrý qajet ekenin atap ótkim keledi. Ásirese Túrkistan, Aqtóbe oblystarynda jas kadrlardy materıaldyq yntalandyrý jumysy jetkiliksiz júrgizilýde. Bul baǵytta Qostanaı, Soltústik Qazaqstan jáne Atyraý oblystarynyń jas mamandardy áleýmettik qoldaýdaǵy tájirıbesin paıdalaný kerek», - dedi Asqar Mamın.
Onyń atap ótýinshe, respýblıkada 2025 jyldyń sońyna deıin 487 obektini salý josparlanǵan.
«Sonymen qatar, 600 astam alǵashqy medıtsınalyq kómek kórsetý obektilerin kúrdeli jóndeýden ótkizý qajet. Qabyldanyp jatqan sharalar, ásirese aýyldyq eldi mekenderdi, alǵashqy medıtsınalyq kómekpen qamtýdy edáýir keńeıtýge múmkindik beredi. Jalpy Densaýlyq saqtaý mınıstrligi usynǵan tásilderdi maquldaýdy usynamyn», - dedi Úkimet basshysy.
