Jas mamannyń kásibı biliktiligin tekserip, sertıfıkat berý ne úshin qajet

ASTANA. QazAqparat – Eńbek jáne halyqty áleýmettik qorǵaý vıtse-mınıstri Erbol Ospanov jas mamandardyń kásibı biliktiligin tekserip, sertıfıkat berý protsesin túsindirdi, dep habarlaıdy QazAqparat tilshisi.

«Mamannyń kásibı biliktiligin sertıfıkattaý boıynsha mınıstrlikke suraqtar kelip jatyr. Bizde buǵan deıin de sertıfıkatsııadan ótip turatyn mamandyq ıeleri bar. Mysaly, býhgalterler kásibıligin sertıfıkatsııadan ótip rastaıdy. Endi mamandyqtardyń aıasy keńeıe túspek. Qazir biz quzyrly organdar jáne «Atameken» ulttyq kásipkerler palatasymen birlesip kásibı biliktilik standarttaryn ázirlep jatyrmyz. Kolledj nemese ýnıversıtet bitirgen túlekterdiń mamandyǵy boıynsha kásibı biliktiligin tekserý úshin «Atameken» UKP janynan akkredıtatsııalaý ortalyǵy ashylady», - dedi Erbol Ospanov OKQ-de ótken brıfıngide.

Onyń aıtýynsha, kásibılikti tekserýdegi maqsat – mamannyń óz isin qanshalyqty biletindigin anyqtaý.

«Jas maman jumys berýshiniń talaptaryna sáıkes kele me? Sony anyqtaıdy. Qolynda sertıfıkaty bar qyzmetker – kásibı bilikti maman degen sóz», - deıdi ol.

Buǵan deıin elimizde áleýmettik qyzmetkerlerdiń mártebesi qaıta qaralyp jatqanyn habarlaǵan edik. Eńbek vıtse-mınıstri Erbol Ospanov málim etkendeı, áleýmettik qyzmetkerlerdiń mártebesi kóterilip, jalaqysy artady.