Jas mamandarǵa qyzmettik baspana qajet – Qaraǵandy oblystyq máslıhatynyń depýtaty
Májilis barysynda jastardy jumyspen jáne turǵyn úımen qamtý, medıtsına, bilim berý qyzmetteriniń sapasyn arttyrý, aýyl sharýashylyǵy óndirýshilerin qoldaý sııaqty ózge de keń aýqymdy máseleler sóz boldy.
Depýtattardyń aıtýynsha, bıyl Qaraǵandy oblysynda aýyl sharýashylyǵyn, densaýlyq saqtaý, týrızmdi damytýǵa, pedagogtardyń IT biliktiligin jetildirýge jáne ekologııalyq qaýipsizdikti qamtamasyz etýge kóp kóńil bólinbek.
«Búgingi tańda aldymyzda turǵan taǵy bir mańyzdy mindet aýyldyq jerlerge jáne shaǵyn qalalarǵa jas mamandardy tartý jáne jumys istep jatqan mamandardy ornyqtyrý bolyp tabylady. Turǵyn úı máselesin sheshpeı, bul múmkin emes. Sondyqtan densaýlyq saqtaý salasy ǵana emes, bilim, mádenıet, sport salasynyń qyzmetkerleri úshin «Qyzmettik turǵyn úı» baǵdarlamasyn ázirleý qajet», - deıdi Qaraǵandy oblystyq máslıhatynyń hatshysy Serik Óteshov.
Depýtattar aýyl sharýashylyǵy óndirýshilerin qoldaý jáne aýyl sharýashylyǵy jerlerin tıimdi paıdalaný, turmystyq qaldyqtarymen baılanysty problemalardy sheshý qajettigin atap ótti. Tegin medıtsınalyq kómektiń kepildik berilgen kólemin usyný, sý resýrstaryn paıdalaný jáne mal jaıylymy máseleleri de sóz boldy.
Sessııada jastar saıasaty máselesine kóp kóńil bólindi. Bul rette basty problema jastardy jumyspen qamtý jáne turǵyn úımen qamtamasyz etý boldy.
«Ótken jyly «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasy aıasynda 16 myńnan astam adam jumysqa ornalasty. Oblystyń 1 436 jas turǵyny jastar tájirıbesine jiberildi. «Dıplommen - aýylǵa» jobasy boıynsha jumysyn jańadan bastaǵan 626 maman járdemaqy men turǵyn úı satyp alýǵa bıýdjetten nesıe aldy», - dedi jastar saıasaty basqarmasynyń basshysy Birjan Álimjanov.
Jumyssyzdyq deńgeıi 2020 jyldyń tórtinshi toqsanynda 3,8%-dy qurady. Osyǵan baılanysty jumysshy jastardy jáne NEET-jastardy jumysqa ornalastyrý jáne oqytý boıynsha jumys jalǵasýda. Mysaly, Saran qalasynda shına shyǵaratyn zaýyt salynyp jatyr. Kompanııa óz esebinen jańa kásiporyn úshin 1 000 jas jumysshyny oqytady.
Depýtattar kelesi sessııada 2020 jylǵa arnalǵan bıýdjettiń atqarylýy, Qaraǵandy oblysynyń ótken jylǵy damý baǵdarlamasynyń iske asyrylý barysy men dene shynyqtyrý men sportty damytý týraly esep berýdi kózdep otyr.
«Bıyl bizge óńir ekonomıkasyn turaqtandyrý, jumys oryndaryn saqtaý jáne bıznesti qoldaý, ómir súrý úshin qolaıly jaǵdaı jasaý boıynsha barlyq sharalardy qabyldaý úshin ózimizdiń basymdyqtarymyzdy qaıta qarastyrý, aǵymdaǵy jáne kúrdeli shyǵystardy qaıta qaraý qajet», - dedi máslıhat depýtattarynyń jumysyna baǵa bergen oblys ákimi Jeńis Qasymbek.
