Jas mamandarǵa eń kóp aılyq usynatyn óńir belgili boldy

ASTANA. KAZINFORM – «Atameken» uttyq kásipkerler palatasy Adamı kapıtaldy damytý departamentiniń dırektory Azamat Beısenbenov JOO túlekterine eń joǵary jalaqy usynatyn óńirlerdi atady.

«Óńirlik taldaý barysynda túlekterdiń jalaqy deńgeıin, jumysqa ornalasýyn jáne jumys izdeýge ketetin ýaqytyn eskere otyryp, ár óńir boıynsha olardyń ortasha kórsetkishterin baǵaladyq. Nátıjesinde eń joǵary jumysqa ornalasý deńgeıi Almaty oblysy (91%) túlekterinde, al eń tómen jumysqa ornalasý deńgeıi Jambyl oblysy túlekterinde (74%) anyqtaldy», - dedi palata ókili.

Sondaı-aq, ol JOO-ny jańa bitirgen túlekterge 180 myń teńgeden joǵary aılyq usynatyn óńirlerdi atady.

«Joǵary jalaqy bolsa (180 myń teńgeden astam) Ulytaý oblysy (336 679 teńge), Qostanaı oblysy (183 741 teńge), Pavlodar oblysy (193 081 teńge), Shyǵys Qazaqstan oblysy (181 922 teńge), Atyraý oblysy (191 786 teńge), Almaty oblysy (227 458 teńge) jáne Almaty qalasy (186 038 teńge) túlekterinde tirkeldi», - dedi Azamat Beısenbenov.