Jas mamandardyń óndiriske beıimdelýi uzaqqa sozylady - Jas ǵalymdar keńesi
ASTANA. QazAqparat - QR Tuńǵysh Prezıdenti janyndaǵy Jas ǵalymdar keńesiniń tóraǵasy Maxmut Tomanovtyń aıtýynsha, búginde ýnıversıtetten kelgen jas mamannyń óndiriske uzaq beıimdelýi bylaı tursyn sol óndiriske ınnovatsııalardy engizý jumysy baıaý júrgiziledi, dep xabarlaıdy QazAqparat tilshisi.
«Qazirgi kezde ýnıversıetterdiń barlyǵy derlik ındýstrııaǵa qajet, al, eń bastysy, soǵan saı mamandardy daıyndap jatyr dep aıtýǵa bolmaıdy. Indýstrııanyń ózi naqty bir mamandardy qalasa da, búgingi oqý baǵdarlamalary ondaı qyzmetkerlerdi daıarlaýǵa saı kelmeıdi. Bir sózben aıtqanda, eskirip qalǵan. Osynyń saldarynan óndiriske keletin bakalavr mamany taǵy bes jyldaı beıimdeledi. Demek, tórt jyl oqıdy, bes jylyn taǵy beıimdelýge ketiredi. Sóıtip, baqandaı toǵyz jyldan keıin bir nárseni isteı bastaıdy. Bul - tym uzaq protses. Qazirgi naryq zamany ondaıdy kótermeıdi», - deıdi Tomanov.
Onyń aıtýynsha, búginde aqparattyq texnologııalar salasyndaǵy ınnovatsııalardy óndiriske engizý úshin jeti jyldaı ýaqyt qajet. Al keıbir qytaılyq kompanııalar ol jumysty alty aıdyń ishinde iske asyryp jatady. «Sonyń bári qytaılyq kompanııalardyń qolynan kelse, bizge olardyń tájirıbesin óz elimizde nege engizbeske? Árıne, bul jerde ǵalymdardyń eńbegi zor. Sebebi olar naqty óndiriske qatysty saraptama jasap, tıimdi ári paıdaly usynystar jasaı alady. Mysaly, bizdiń ulttyq kompanııalarymyz belgili bir texnologııany satyp alady. Biraq ol eskirgen bolyp shyǵady. Ondaı oqıǵalar az emes. Al ǵylym men óndiris arasyndaǵy myqty baılanys ornatylsa, zaman talabyna saı texnologııalardy alýǵa bolady. Sebebi ǵalymdar onyń bárin saraptap otyrady», - dep atap kórsetti jas ǵalymdardyń basshysy.
