Jas mamandardy qabyldaý barysynda jumys berýshiler úshin táýekeldi tómendetý sharalary bolsa ıgi - A. Perýashev
Bul týraly búgin Parlament Senatynda «Jumyspen qamtý - 2020» memlekettik baǵdarlamasynyń iske asyrylý barysyna arnalǵan dóńgelek ústelde Májilis depýtaty Azat Perýashev aıtty.
«Bir jaǵynan alǵanda bizde bilikti maman tapshy, al ekinshi jaǵynan oqýyn jańa bitirgen azamattar jumysqa ornalasa almaı sabylyp júr. Máselen, ýchılışe men kolledjden soń túlekterdi stanoktardyń, jabdyqtardyń mańyna jýytpaıdy. Jumys berýshiler álgindeı jas maman qymbat jabdyq pen qondyrǵyny qurtady, búldiredi dep qorqady. Al Eýroodaqtyń tájirıbesine kelsek, eger ondaı qondyrǵy búlingen jaǵdaıda jumysshynyń jaýapkershiligin memlekettik saqtandyrý arqyly qoldaý sharalary qarastyrylady», - deıdi Azat Perýashev.
Onyń paıymynsha, bul jumys berýshiler úshin asa mańyzdy dúnıe. Budan bólek, depýtat jańa mamandardy jumysqa alý barysyndaǵy synaq merziminde olardyń eńbekaqysyn sýbsıdııalaý máselesin de tilge tıek etti. «Bul sharalardyń basym bóligi damyǵan elderde qoldanylyp keledi», - dedi ol.