Jas qyzdy sýdan qutqarǵan Artemge medal tapsyryldy
QOSTANAI OBLYSY. Tamyzdyń 17-si. QazAqparat - Jaz aıy bastalsa boldy, turǵyndar jaǵajaılarǵa aǵyla bastaıdy. Olar órt pen sýdyń tilsiz jaý ekendigin eskere de bermeıdi. Bıylǵy mı qaınatqan ystyqtyń saldarynan sýǵa shomylýshylardyń da qatary artqan. Tilsiz jaýdyń qurbany bolyp jatqandary da qanshama. Bıyl oblystyq sýdan qutqarý qyzmeti mekemesi mamandarynyń arqasynda jetpisten astam adam sýdan qutqarylǵan, onyń 13-i balalar kórinedi. Al, 27 adam tilsiz jaýdyń qurbany bolǵan...
Osyndaı bir tótenshe oqıǵa taıaý kúnderi Qostanaı oblysynda oryn aldy, dep habarlaıdy Qostanaı oblystyq TJ jónindegi departament baspasóz qyzmetinen. Sýǵa batyp bara jatqan jas qyzdy sýdan qutqarǵan Artem esimdi jıyrma jasar jigit sýdan qutqarý mekemesiniń mamany da emes, ol Qostanaı aýdanynyń Sadovyı aýylyndaǵy orta mektepte dene shynyqtyrý páninen sabaq beredi. Maýsym aıynyń ortasynda osy aýyldyń kishkentaı turǵyny 12 jasar Gúlmıra Ámirǵalıevanyń sýǵa ketip qalyp, ony Artem Kolesnıchenkonyń qutqaryp qalǵany týraly jergilikti telearnalardan kórsetilgen bolatyn. Oqıǵany qysqasha aıtar bolsaq, sol kúni keshki jetiler shamasynda sýǵa túsýge kelgen Artemǵa oqýshylarynyń biri kelip, Gúlmıranyń sýǵa ketip qalǵandyǵyn jetkizedi. Sol sátte jas jigit oılanbastan sýǵa qoıyp ketedi de, eki jarym metrdeı tereńdikte jatqan qyzdy alyp shyǵady.
Al, oblystyq sýdan qutqarý qyzmeti mekemesiniń bastyǵy Sergeı Stepanenkonyń aıtýynsha, mundaı jaǵdaı, ıaǵnı jıyrma mınýt boıy sýdyń astynda jatqan adamnyń tiri qalýy sırek kezdesetin jáıt. Shynynda da, Gúlmıranyń kórer kúni alda eken, eki aı boıy jan saqtaý bóliminde jatqan qyz jaqynda úıine shyqty. Qazir jaǵdaıy asa jaman emes, tek asqazany ǵana áli qalypqa kelmeı jatqan kórinedi. Artem bolmaǵanda Gúlmıranyń aman qalýy da ekitalaı edi. Sebebi, sýdyń jaǵasynda sol kúni eresek adamdar da bolǵan kórinedi.
Olar tótenshe jaǵdaı mamandaryna qońyraý shalyp, jedel-járdem kóligin shaqyrýdan aspaǵan. Al, Artem bolsa, esh oılanbastan sýǵa súńgip, kishkentaı qyzdy qutqaryp qaldy. On eki jasar qyzdyń janyna arasha bolyp, tilsiz jaýdyń tyrnaǵynan saqtap qalǵan onyń erligin áriptesteri de umytqan joq. Keshe jas jigitti oblystyq tótenshe jaǵdaılar departamentiniń basshylary QR Tótenshe jaǵdaılar mınıstrliginiń "Tótenshe jaǵdaıdaǵy erligi úshin" medalimen marapattady. Árıne, Artem bul qurmetke ábden laıyq. Desek te, jas jigit buǵan masattanbaı, medal alǵanyna emes, adamdy ajal tyrnaǵynan aman alyp qalǵanyna qýanady.
«Aıaq astynan bolǵan oqıǵa ǵoı. Bir jaǵynan balalarǵa sabaq beremin, oqýshyǵa degen jaýapkershilikti sezingendikten bolar, esh oılanbastan bel býǵanym da. Qınalǵan kez kelgen adamǵa járdemdesý ár er azamattyń paryzy dep bilemin», - deıdi Artem Kolesnıchenko.
