Jas qyzdardy jumysqa tartyp, vebkam-stýdııalar ashqan qylmystyq top 1 mlrd teńge paıda tapqan

ÓSKEMEN. KAZINFORM – Shyǵys Qazaqstan oblysynyń polıtseıleri vebkam-stýdııalar ashyp, ashyq translıatsııalar júrgizip otyrǵan qylmystyq toptyń jolyn kesti.

ShQO polıtsııa departamenti baspasóz qyzmetiniń málimetine súıensek, tártip saqshylary ınternet arqyly Qazaqstan aýmaǵynda zańmen tyıym salynǵan beınematerıaldardy daıyndap, taratqan qylmystyq topty áshkereledi.

- Bul top «modeldik agenttik» degen ataýmen eldiń 10-nan astam qalasynda, sonyń ishinde Óskemende vebkam-stýdııalar ashyp, ashyq translıatsııalar júrgizip otyrǵan. Olar 18 ben 25 jas aralyǵyndaǵy qyzdardy jumysqa tartyp, aıyna 2 mln teńgege deıin tabys tabýǵa bolady dep ýáde bergen, - delingen aqparatta.

Arnaıy júrgizilgen jedel-izdestirý sharalarynyń nátıjesinde, uıymdastyrýshylar 1 mlrd teńgeden astam kiris tapqany anyqtaldy.

- Tintý kezinde 120-dan astam kompıýter, veb-kamera, jaryqtandyrý qurylǵylary jáne basqa da tehnıkalar tárkilendi. Qazirgi tańda bul iske qatysy bar 14 adam ustaldy. Olardyń arasynda osy bıznesti uıymdastyrǵan negizgi adamdar da bar. Tergeý aıaqtalýǵa jaqyn, - delingen habarlamada.

Eske salsaq, osyǵan deıin Aqtóbe oblysynda 77 júk kóligin zańsyz tirkegen uıymdasqan top ustalǵany habarlanǵan.