Jas – kedergi emes: ShQO-da 50 jastaǵy áıelderden júktilik anyqtaldy

ÓSKEMEN. KAZINFORM — Shyǵys Qazaqstan oblysynda reprodýktıvti jastaǵy joǵarǵy mejeden asqan áıelderdiń júktiligi tirkelip jatyr.

Osyǵan baılanysty ekstrakorporaldy uryqtandyrý (EKU) protsedýrasyn júrgizýge arnalǵan jas shegin qaıta qaraý máselesi talqylanyp jatyr.

Qazirgi tańda áıelderdiń fertıldi (balaly bolýǵa qabiletti) jasy resmı túrde 49 jaspen shekteledi. Alaıda buǵan deıin bul protsedýrany 49 jastan asqan áıelder de qabyldaı alatyn. 2025 jyldan bastap EKU jasatýǵa ruqsat etiletin jasty 45 jaspen shekteý josparlanyp otyr. Sebebi bul jastan keıin áıelderdiń densaýlyǵyna baılanysty asqyný qaýpi aıtarlyqtaı artady.

— 45 jastan keıin ana men bala ómirine tónetin qaýip joǵarylaıdy. Ótken jyly EKU arqyly 52 jastaǵy áıel sábı súıdi. Bıyl 47 jastaǵy áıel tabıǵı jolmen bosandy. Qalaı bolǵanda da, biz áıelderdi tolyq medıtsınalyq tekserýden ótýge, sozylmaly aýrýlaryn emdeýge jáne júktilikti aldyn ala josparlaýǵa shaqyramyz, — dedi ShQO bas reprodýktologi Nadıra Slıamhanova.

Eske salsaq, osyǵan deıin 25 áıeldiń bireýi ǵana júktilikti arnaıy josparlaıtyndyǵy habarlanǵan.