Jas qazaqstandyq kompozıtor Ábdisaǵyn Rahat-Bı Kıevte jáne Gratsta ótetin halyqaralyq festıvalderde Qazaqstannyń namysyn qorǵaıdy
ASTANA. 8 aqpan. QazAqparat - 4-10 aqpan aralyǵynda Kıevte «Golfstrım 2» Halyqaralyq zamanaýı mýzyka festıvali ótýde.
Festıvalde jas qazaqstandyq kompozıtor-pıanıst Ábdisaǵyn Rahat-Bıdiń vıolonchel jáne fortepıano úshin «Tonnel sońyndaǵy jaryq» pesasynyń premerasy ótedi. Shyǵarmany "Ensemble Nostri Temporis" jáne "Rıkoshet" ansamblderiniń uıymdastyrýshylary, tanymal ýkraındyq mýzykanttar Zoltan Almash jáne Alekseı Shmýrak oryndaıdy.
Sonymen qatar jas daryn aǵymdaǵy jyldyń 9-22 aqpan aralyǵynda Grats (Avstrııa) qalasynda ótetin Halyqaralyq zamanaýı mýzyka forýmynda Qazaqstannyń namysyn qorǵaıtyn bolady.
Atap óteıik, Rahat-Bı - Beat Fýrrer, Jorj Apergıs, Perlýıdjı Bıllone jáne basqa da álemdik kompozıtorlar qatysatyn forýmnyń kámelettik jasqa tolmaǵan jalǵyz qatysýshysy. Forýmǵa 40-tan astam memleket qatysady.
