Jas qazaqstandyq daryndar Máskeýde Halyqaralyq balalar festıvalinde Gran-prı jeńip aldy
MÁSKEÝ. QazAqparat - Máskeýde «Óner planetasy» («Planet of arts») VI Halyqaralyq balalar shyǵarmashylyq forýmy jáne festıval-baıqaýy ótti.
Festıval taqyryby álem halyqtarynyń mýzykasy, bıi, ánderi, sáni men qolóneri boldy. Festıvalǵa Máskeýden, Reseı óńirlerinen, taıaý shetelden 500-den astam balalar qatysty. Olar óz elderiniń mádenıetin usyndy. Forým-festıvaldiń basty maqsaty - túrli elderdiń mádenıetin nasıhattaý, ózara tájirıbe almasýǵa járdemdesý, balalar arasynda shyǵarmashylyqty damytý.
«Qalalar ómiri» festıvali komıtetiniń bas dırektory Galına Skvortsova atap ótkendeı, «bul forýmnyń maqsaty - balalardyń álemdik mádenıetke qyzyǵýshylyǵyn arttyrý, olardyń ózine tán erekshelikterin kórsetý».
«Biz Qazaqstanmen belsendi jumys júrgizýdemiz. Ol eldiń balalary óte daryndy, tamasha ári súıkimdi», - dep qosty ol.
Festıvalǵa Qazaqstannan qatysqandar: Semeıdegi №2 mýzykalyk mektebiniń ánshi-vokalısi Nazerke Tóleýbekova, Rasýl Serikjan, sondaı-aq osy qaladaǵy «Oblystyq daryndy balalarǵa arnalǵan mamandandyrylǵan balet mektebi» KMQK horeografııalyq ansambli.
Festıval qorytyndysy boıynsha Semeı qalasyndaǵy daryndy balalarǵa arnalǵan oblystyq mamandandyrylǵan balet mektebi joǵary kórkem sheberligi, álem elderi mádenıetin nasıhattaǵany, barlyq elder arasynda dostyq pen kelisimdi qoldaǵany úshin «Klassıkalyq horeografııa» nomınatsııasynyń Gran-prıin utyp aldy, sonymen birge álem halyqtarynyń ulttyq mádenıetin nasıhattaǵany jáne kórsetilgen joǵary kórkemdik deńgeıi úshin «Halyq bıi» atalymynyń birinshi dárejeli dıplomyn ıelendi.
«Biz Máskeýge Qazaqstannyń bedelin arttyrý úshin keldik», - dep atap ótti mektep basshysy Kamılııa Ysmaılova.
