Jas qazaq aqyndarynyń óleńderi «Ortalyq Azııa jyr antologııasyna» endi

ASTANA. QazAqparat – «Ortalyq Azııa jyr antologııasyna» jas qazaq aqyndarynyń óleńderi endi. Bul týraly Qazaqstandaǵy Gete ınstıtýtynyń baspasóz qyzmetinen málim etti, dep habarlaıdy QazAqparat tilshisi.

24 sáýirde Berlın qalasyndaǵy Gýmboldt ýnıversıtetinde jas qazaq aqyndarynyń óleńderi engen «Ortalyq Azııa jyr antologııasynyń» tusaýy kesildi.

«2021-2022 jyldary Gete ınstıtýtynyń uıymdastyrýymen ótken «Grand Tour Zentralasien» jobasynyń jalǵasy retinde Ortalyq Azııa elderi jas aqyndarynyń jyrlary nemis tiline aýdaryldy» delingen baspasóz málimetinde.

Sııasy keppegen antologııa alǵash ret Berlın jáne Leıptsıg qalalarynda kópshilikke tanystyrylyp, nemis tildi oqyrmandar nazaryna usynylady.

Jyr jınaǵyna jas qazaq aqyndary Saǵynysh Namazshamova, Jeńisbek Pazyl, Batyrhan Sársenhan, Edilbek Dúısen jáne Mıras Asannyń óleńderi engen. Al qyrǵyzdyń Alıman Abdykerımova, Narsýlýý Gýrgýbaeva, Gúlzada Stanalıeva, Nýrıza Ómúrbaeva jáne Mahabat Qaseıınova syndy aqyndarynyń óleńderi aýdarylǵan.