Jas karateshiler AQSh-tan 3 altyn, 6 kúmis, 5 qola medalmen oraldy (FOTO)
ASTANA. QazAqparat - Búgin AQSh-tyń Las-Vegas qalasynda ótken úshinshi halyqaralyq týrnırge qatysyp qaıtqan jas karateshiler elimizge oljaly oraldy.
Bul týraly QR Mádenıet jáne sport mınıstrliginiń baspasóz ortalyǵy habarlady.
Las-Vegasta karate-do boıynsha úsh birdeı týrnır ótti (Junior Chempionship, USA Open jáne Ozawa Cup). Halyqaralyq bedeldi jarysqa álemniń 40-tan astam elinen jas sportshylary qatysqan. Dodada jerlesterimiz 3 altyn, 6 kúmis, 5 qola - jalpy 14 medal jeńip aldy.
Atap aıtatyn bolsaq, Junior Chempionship jarysynda Danıl Kan jeńimpaz atansa, Álisher Qabdollaev pen Álkeı Ahmetjanov ekinshi oryndy, karateniń kata túrinen Serjan Jańbyrshın qola júldeni ıelendi. «USA Open 2016» boıynsha Qaısar Kýanysh, Serjan Jańbyrshın, Danıl Kan komandalyq katadan kúmis medaldi aldy. Osy saıystyń jekeleı túrinde Danıl Kan men Álkeı Ahmetjanov qola júldege ıe boldy.
Al «Ozawa Cup 2016» jarysynda katadan ótken jekpe-jekte Serjan Jańbyrshın men Álkeı Ahmetjanov chempıon atandy. Sondaı-aq Danııl Kan men Qaısar Kýanysh úzdik úshtikti qorytyndylady.
Sportshylardy búgin tańǵy saǵat 06:15-te Astana áýejaıyna týǵan-týystary, mınıstrlik qyzmetkerleri, buqaralyq aqparat quraldarynyń ókilderi kútip aldy.
