«Jas qanat» jas talanttardy shaqyrady
ASTANA. QazAqparat - 12 mamyrda elimizdegi erekshe tanymaldyqqa ıe mýzykalyq jobalardyń biri «Jas qanat» Respýblıkalyq jas oryndaýshylar baıqaýy bastalady.
Ótken jyly Táýelsizdigimizdiń tól qurdasy «Jas qanat» jobasynyń 25 jyldyq mereıtoıy atap ótildi. Osy ýaqyt aralyǵynda «Jas qanat» baıqaýy qazirgi tańda halyqtyń ystyq yqylasyna bólenip júrgen birshama otandyq estrada juldyzdarynyń baǵyn ashty. Olardyń ishinde Medeý Arynbaev, Erlan Kókeev, Nurlan Abdýllın, «Úrker» toby, Baqyt Shadaeva, Janar Duǵalova, Mádına Sádýaqasova, Qurmash Mahan, Sáken Maıǵazıev, Gaýhar Qaspaqova, Altynaı Jorabaeva, Janna Orynbasarova, Nurlan Alban, Beıbit Qorǵan, Gúlnur Orazymbetovalar bar.
2012 jyly baıqaýdyń bas júldesin Dımash Qudaıbergenov ıelendi. Sol kezdegi bala Dımash búginde Qytaıda ótken álemge aty shýly «I am a Singer» baıqaýyna qatysyp, tórtkúl dúnıege tanyldy. Bıyl Astanada ótetin baıqaýǵa Shyǵys Qazaqstannan tutas delegatsııa keledi, ishinde 5 adamnan quralǵan INCORO toby da bar.
Budan basqa, Óskemen, Pavlodar, Aqtaý, Taraz, Petropavl, Almaty, Kókshetaý, Shymkent, Qaraǵandy, Taldyqorǵan, Astana qalalarynyń jas vokalısteri baq synaıdy.
Uıymdastyrýshylardyń aıtýynsha, bıyl baıqaý formaty men ýaqytyna qatysty birqatar ózgerister engizilgen.
2017 jyldyń eń dúbirli básekesi Astanadaǵy kıeli sahnalardyń biri - Beıbitshilik jáne kelisim saraıynda 12-14 mamyr aralyǵynda ótedi.
