«Jas qanat» baıqaýyna Baıqońyr men Stepnogordyń ónerpazdary alǵash ret qatysady
ASTANA. QazAqparat - 29-31 mamyr aralyǵynda Beıbitshilik jáne kelisim saraıynda «Jas qanat» jas ánshilerdiń 24-shi respýblıkalyq baıqaýy ótedi, dep habarlady qalalyq ákimdiktiń baspasóz qyzmetinen.
Baıqaý uıymdastyrýshylary: Astana qalasy ákimdiginiń Mádenıet basqarmasy jáne «Azııa daýysy» dırektsııasy.
«Eń úzdik oryndaýshy» ataǵyna ıe bolý úshin elimizdiń túkpir-túkpirinen kelgen jas, daryndy ánshilerimiz synǵa túsedi. Elordalyq turǵyndarǵa «jasqanattyqtar» óz ónerin 3 saıystyq kezeńde kórsetetin bolady. Bıyl baıqaýǵa elimizdiń 10 qalasynan 15 jas ánshi qatysatyn bolady. Alǵash ret sahna tórinde kishigirim bolsa da, jeńiske laıyq Ekibastuz, Baıqońyr, Stepnogor qalalarynyń ókilderi qabiletterin pash etedi. Al elordanyń namysyn 5 qatysýshy qorǵaıdy: Sultan Ahmet, Súleımen Oljas, Nurbol Sydyqov, Nurlan Týkenov, Erkebulan Turmuhambetov. Eń jas ánshi 17 jasta bolsa, eń úlkeni 26-ǵa toldy. Qatysýshylardyń ortasha jasy - 21. Jas ánshiler qatań ádil qazylardyń aldynda 3 kún boıy ónerin kórsetedi. Aqtyq synǵa tek 3 úmitker jetedi. Sáıkesinshe, olar «altyn», «kúmis», «qola» qanattardyń ıesi atanady.
