«Jas qanat 2019» baıqaýyna Aqmola oblysynan qatysatyn ánshi anyqtaldy
KÓKShETAÝ. QazAqparat - Kókshetaýda jas ánshiler arasyndaǵy «Aqmola jas qanat» alǵashqy baıqaýynyń jeńimpazdary anyqtaldy, dep habarlaıdy QazAqparat tilshisi.
Aqmola oblysynyń Іshki saıasat basqarmasynan málim etkendeı, Jastar jyly sheńberinde uıymdastyrylǵan baıqaýǵa oblystyń ár óńirinen jınalǵan 34 jas ánshiniń 18-i ǵana fınalǵa joldama aldy.
Kil myqtylardyń arasynda Kókshetaý qalasynyń úkili úmiti Ádil Baltabaev jeńimpaz boldy. Ol «Jas qanat 2019» respýblıkalyq baıqaýyna qatysýǵa joldama aldy.
Sahnaǵa shyqqan qatysýshylardyń barlyǵy kórermenniń kóńilinen shyqty.
«Olardyń arasynda «Rodına» vokaldyq-aspaptyq ansambli, «Garmonııa» hory, Aınamkóz Táshenov, Aqtoty Sádýaqas jáne Olesıa Anışenko arnaıy dıplomdarmen marapattaldy», - deıdi Aqmola oblysy Іshki saıasat basqarmasynyń baspasóz qyzmetindegiler.
Aıta keteıik, jas talanttardyń «Jas qanat» baıqaýy alǵash ret 1992 jyly Almatyda ótti. Bul baıqaýdyń «Azııa daýysynan» aıyrmashylyǵy munda tek qazaqstandyq jas oryndaýshylar ǵana qatysa alady. Taǵy bir ereksheligi, ol bir ret óner kórsetken adam ekinshi ret qatysa almaıdy. ıAǵnı, jyl saıyn jańa juldyzdar janady.
