«Jas qanat - 2013» baıqaýynyń jeńimpazy anyqtaldy
ASTANA. 10 maýsym. QazAqparat - Keshe Astanada jas oryndaýshylardyń «Jas qanat - 2013» HHІІ respýblıkalyq baıqaýy aıaqtaldy.
Úsh kúnge sozylǵan óner dodasynyń qorytyndysy boıynsha baıqaýdyń bas júldesin aqtaýlyq Aıda Baıgelova jeńip aldy. Buǵan deıin buqaralyq aqparat quraldaryna bergen bir suhbatynda ol: «Jas qanat» baıqaýyna qatysqanyma óte qýanyshtymyn. Talaı eldegi án baıqaýlaryn syrttaı baqylap júremin. «Jas qanatty» uıymdastyrý deńgeıi shet elderdegi iri óner dodalarynyń eshqaısysynan qalyspaıdy. Jyl ótken saıyn damyp, qanatyn keńge jaıyp keledi. Ózime kelsem, óńirde ótken baıqaýlardy qalt jibergen jaıym joq. Alǵan júldem de jetkilikti. Endigi kózdegen nysanam - osy baıqaýdyń júldesi. Adamdy senim aldamaıdy degen sóz bar emes pe. Men ózime senemin», - degen bolatyn. Osylaısha, Aıdanyń senimi aqtaldy.
