Jas qalamgerlerge arnalǵan Prezıdenttik ádebı syılyqqa ótinim qabyldaý jalǵasyp jatyr
ASTANA. KAZINFORM – Jas qazaqstandyq jazýshylar men aqyndarǵa arnalǵan Prezıdenttiń arnaýly ádebı syılyǵyna ótinim qabyldaý 2026 jylǵy 30 maýsymǵa deıin jalǵasady.
Bul syılyq jas qalamgerlerge memlekettik qoldaý kórsetý jáne talantty aqyn-jazýshylardyń jańa býynyn qalyptastyrý maqsatynda taǵaıyndalǵan. Bıyl atalǵan ádebı syılyq tórtinshi ret tabystalady.
Syılyqqa 18 ben 35 jas aralyǵyndaǵy qalamgerler qatysa alady. Úmitkerler buryn halyqaralyq nemese ulttyq baıqaýlarǵa usynylmaǵan shyǵarmalaryn joldaýy tıis.
Ótinimder «Proza», «Poezııa», «Dramatýrgııa» jáne «Balalar ádebıeti» nomınatsııalary boıynsha qabyldanady. Avtor tek bir nomınatsııa boıynsha ǵana qatysýǵa quqyly.
«Prezıdenttiń arnaýly ádebı syılyǵy talantty jas qalamgerlerdi qoldaýǵa jáne ulttyq ádebıettiń damýyna serpin berýge baǵyttalǵan. Baıqaýǵa buryn eshqandaı halyqaralyq nemese ulttyq konkýrsqa usynylmaǵan týyndylar qabyldanady. Úmitkerler shyǵarmalaryn tórt nomınatsııanyń biri boıynsha ǵana usyna alady. Bıyl ádebı syılyq tórtinshi ret tabystalmaq», – dep habarlady uıymdastyrýshylar.
Ótinimder qaǵaz jáne elektrondy nusqada qabyldanady.
Qujattardy Astana qalasy, Máńgilik El dańǵyly, 8, 14-kireberis, QR Mádenıet jáne aqparat mınıstrliginiń Arhıv, qujattama jáne kitap isi komıteti, 273-kabınet mekenjaıyna joldaý qajet.
Qosymsha aqparatty +7 (707) 525 24 54, 8 (7172) 740407, 8 (7172) 740384 jáne 8 (7172) 740408 telefon nómirleri arqyly alýǵa bolady.
Aıta keteıik, Abaı atyndaǵy memlekettik syılyqqa úmitkerlerdiń kelesi kezeńi anyqtaldy.
