Túrkistan tehnologııalyq progress pen jańa zııatkerlik alańǵa aınalyp keledi
TÚRKІSTAN. KAZINFORM – Túrkistan qalasynda alǵash ret memlekettik tilde ótken resmı TEDx konferentsııasy uıymdastyryldy. Іs-shara tsıfrlandyrý, jasandy ıntellekt jáne bolashaq daǵdylary taqyryptaryna arnaldy.
TEDxZhenysPark uıymdastyrýshysy ári «Simba’s School» mektebiniń dırektory Symbat Paıaevanyń aıtýynsha, kóne Túrkistan búginde tehnologııalyq progress pen bolashaqqa qatysty mańyzdy máseleler talqylanatyn jańa zııatkerlik alańǵa aınalyp keledi.
– Túrkistan – ejelden túrli mádenıetter men ıdeıalar toǵysqan meken. Búginde bul qala bolashaq, jasandy ıntellekt pen tsıfrlandyrý máselelerin talqylaýǵa óte qolaıly ortaǵa aınalyp otyr. Biz tehnologııalyq ózgerister týraly aıttyq, biraq ony óz qundylyqtarymyz ben mádenı kodymyz arqyly túsindirýge tyrystyq. Mundaı alańdar ár óńirden, tipti ózge elderden de belsendi ári izdenimpaz adamdardy jınap, jańa seriktestikterdiń qalyptasýyna múmkindik beredi, – dedi ol.
Konferentsııaǵa túrli salanyń ókilderi qatysyp, óz tájirıbeleri men ıdeıalaryn ortaǵa saldy. Jalpy TEDx sahnasyna 9 spıker shyqty. Onyń altaýy áıel, úsheýi er azamat boldy.
Uıymdastyrýshynyń pikirinshe, jobanyń basty ereksheligi – Qazaqstan tarıhyndaǵy tolyqtaı qazaq tilinde ótken alǵashqy resmı TEDx konferentsııasy bolýy.
– Bul biz úshin úlken jaýapkershilik boldy. Kópshilik kúrdeli ıdeıalar men tereń mazmundaǵy taqyryptardy qazaq tilinde qanshalyqty tabıǵı ári túsinikti jetkizýge bolady degen saýal qoıdy. Alaıda is-shara joǵary deńgeıde ótip, mundaı kúmánniń orynsyz ekenin kórsetti. Konferentsııa qazaq tiliniń tek kúndelikti qarym-qatynas quraly ǵana emes, ınnovatsııa, kásipkerlik jáne ıntellektýaldyq pikirtalastar tili bola alatynyn dáleldedi, – dedi Symbat Paıaeva.
Onyń aıtýynsha, jobany uıymdastyrý kezinde TEDx formatynyń erekshelikterin túsindirý negizgi qıyndyqtardyń biri bolǵan.
Soǵan qaramastan, is-sharaǵa jınalǵan aýdıtorııa spıkerlerdiń baıandamalaryna belsendi qatysyp, talqylaýlar konferentsııa aıaqtalǵannan keıin de jalǵasqan.
Uıymdastyrýshylar aldaǵy ýaqytta TEDx jobasynyń aýqymyn keńeıtip, Ortalyq Azııa men Eýropa elderinen sarapshylar tartýdy josparlap otyr.
– Alǵashqy TEDx jastardyń sapaly bilimge, jańa ıdeıalarǵa jáne tsıfrlyq trendterge degen qyzyǵýshylyǵy joǵary ekenin kórsetti. Bul baǵyttyń bolashaǵy zor, – dep túıindedi Symbat Paıaeva.
Aıta keteıik, túrkistandyq túlek álemniń 80-nen astam jetekshi ýnıversıtetinen shaqyrtý aldy.
