«Jas hımık» zııatkerlik baıqaýyna Astananyń eń úzdik mektepteri qatysýda
ASTANA. 18 qarasha. QazAqparat - «Jas hımık» zııatkerlik jarysynyń irikteý týrynyń qorytyndylary boıynsha 5 komanda qatysýǵa múmkindik aldy,
dep habarlaıdy «QazMunaıGaz» AQ baspasóz qyzmeti.
Atalmysh zııatkerlik baıqaý Astana qalasynyń 9-11 synyp oqýshylary arasynda el Táýelsizdiginiń 20 jyldyǵyna oraı ótkizilýde. Sharany «QazMunaıGaz» AQ jáne KAZENERGY qaýymdastyǵy mektep jasyndaǵy zerek balalardyń kásiptik baǵdaryn aıqyndaý boıynsha birlesken jumys sheńberinde uıymdastyryp otyr.
«18 qarasha kúni irikteýden súrinbeı ótken balalardyń elektrondyq poshtalaryna «Jas hımık» konkýrsynyń basty erejeleri jáne negizgi týrlaryna qatysýǵa arnalǵan birqatar tapsyrmalar beriledi. Baıqaý jeńimpazdary estelik syılyqtarmen jáne sertıfıkattarmen marapattalady», - delingen baspasóz habarlamasynda.
Málim etilgenindeı, jarysqa qatysýǵa 2011-2012 oqý jylynda Nazarbaev Ýnıversıtetine túsken stýdentterdiń nátıjeleri boıynsha jasalǵan reıtıngtiń eń joǵary satylarynda ornalasqan Astananyń 10 orta mektebiniń komandasy shaqyrylǵan.
Komandalardyń jumystaryn L.N.Gýmılev atyndaǵy Eýrazııa Ulttyq ýnıversıtetiniń, Nazarbaev Ýnıversıtetiniń professorlary men doktorlary jáne «Bolashaq» stıpendıattary baǵalady.
Aıta ketý kerek, baıqaý qazaq tilinde ótkizilýde.
