Jas geologtardyń ashyq dalalyq olımpıadasy ótedi
ASTANA. QazAqparat - 2014 jyldyń 1 tamyzynda «Aq erke» halyqaralyq balalar ortalyǵynda Jas geologtardyń ІІІ Qazaqstandyq ashyq dalalyq olımpıadasy ótedi. Bul týraly Qazaqstan Respýblıkasynyń Indýstrııa jáne jańa tehnologııalar mınıstrliginen habarlandy.
Baspasóz qyzmetiniń málimetterine qaraǵanda, olımpıadaǵa Qazaqstan óńirlerinen, sondaı-aq Reseı, Ózbekstan, Qyrǵyzstan men Tájikstannan barlyǵy úsh júzge jýyq bala qatysady dep josparlanýda. «Jas geologtar olımpıadasynyń negizgi maqsaty men mindeti jastardy kásiptik beıimdeý, bilim alýshylardyń geologııalyq ǵylymdardy zertteýge qyzyǵýshylyǵyn arttyrý bolyp tabylady. Budan bólek, shara geologııanyń qoldanbaly mańyzy men ony ǵylym retinde nasıhattaýdy, sonymen qatar, osy salaǵa qyzyǵatyn daryndy balalardy anyqtap, olarǵa qoldaý kórsetýdi maqsat etedi», - delingen baspasóz baıanynda.
