Jas ǵalymdarǵa bastamashyl áleýmettik top retinde úlken senim artylady - Mahmýt Tomanov
ALMATY. QazAqparat - Almatyda jas ǵalymdar Elbasy joldaýyndaǵy 5 baǵytty talqylady, dep habarlaıdy QazAqparat tilshisi.
Búgin Almatyda «Qazaqstan Respýblıkasy Tuńǵysh Prezıdenti - Elbasy qorynyń Jas ǵalymdar keńesi jańa Joldaýdy talqylady. Basty baıandamashy, atalǵan ǵylymı keńes tóraǵasy, ekonomıka ǵylymdarynyń kandıdaty Mahmýt Tomanov jıynda jas ǵalymdar, magıstranttardy Elbasy joldaýyndaǵy áleýmettik máseleler týraly aıtqany qyzyqtyrǵanyn jetkizdi.
«Jas ǵalymdarǵa qoǵamnyń qazirgi damý kezeńinde qajetti ınnovatsııalyq jáne ıntellektýaldy ónimder shyǵarýǵa qabiletti eń belsendi, bastamashyl áleýmettik top retinde úlken senim artylady. Álemdegi daǵdarysqa qaramastan memleketimizdiń áleýmettik sektorǵa barynsha kóńil bólip otyrǵany jas ǵalymdar nazarynan tys qalmady. Jas ǵalymdarymyz sandyq ekonomıka týraly da baıandama jasady. Onyń ishine, mobıldi kommertsııa, ınternet dúkendi damytýǵa qatysty jastar óz pikirin ortaǵa saldy. Densaýlyq salasynda da jas ǵalymdar sapaly bilim jóninde aıtyp otyr. Sandyq ekonomıka osy salada da barlyǵyna járdem etpek», - dedi Mahmýt Tomanov.
Onyń aıtýynsha, bul sharanyń maqsaty Elbasy Joldaýyndaǵy 5 baǵytty jastar arasynda ǵana emes, jalpy halyqqa jetkizý.
«Qazaqstan Respýblıkasy Tuńǵysh Prezıdenti - Elbasy qorynyń Jas ǵalymdar keńesi jastarǵa qoldaý kórsetý úshin qurylǵan. Biz jas ǵalymdardy jeke nemese memlekettik JOO-da bilim alyp jatyr dep bólmeı, ortaq qoldaý tanytamyz. Bizdiń aldaǵy mindetterimizdiń biri -EKSPO-2017 halyqaralyq kórmesindegi qazaqstandyq pavılonda jas ǵalymdarymyzdyń eńbekterin tanystyrý. Bul óte aýyr mindet, biz osyny atqaryp shyǵýymyz kerek», dedi ol.
