Jas ǵalymdar mártebesi artsa deımin - S.Ǵızzatov, «BQO jas ǵalymdar keńesi» qoǵamdyq birlestiginiń tóraǵasy

ASTANA. 6 qazan. QazAqparat /Eljan Eraly/ - Jastardy ǵylymǵa tartýǵa erekshe mán berilýi kerek. Bul týraly Astanada ótip jatqan besinshi Azamattyq forýmǵa Batys Qazaqstan oblysynan qatysyp jatqan delegattyń biri, «BQO jas ǵalymdar keńesi» qoǵamdyq birlestiginiń tóraǵasy, tarıh ǵylymdarynyń kandıdaty, M.Ótemisuly atyndaǵy Batys Qazaqstan memlekettik ýnıversıteti ǵylymı-zertteý jumystary bóliminiń jetekshisi Saıalbek Ǵızzatov málim etti.

«Qazirgi kezde ǵylymda úlken jańalyqtar bolyp jatyr. Bıylǵy 18 aqpanda «Ǵylym týraly» QR Zańy qabyldandy. Soǵan sáıkes elimizde naqty jumystar atqarylýda. Forýmnan kútetinim - jas ǵalymdardy qoldaýǵa baǵyttalǵan ıgi bastamalar kóterilse eken. Sonyń ishinde ǵylymǵa bólinetin qarajat, jas ǵalymdar mártebesin kóterý, ǵylymı jobalar sanyn arttyrý máseleleri sheshilse, ońdy bolar edi. Ásirese, jastardy ǵylymǵa tartý jóninde naqty sharalar alynýy qajet dep esepteımin», dedi S.Ǵızzatov.