Jas ǵalymdar aǵa býyn professorlardyń «kóleńkesinde» qalyp qoıýda - QazATÝ rektory
ASTANA. 11 mamyr. QazAqparat - Jastar ǵylym salasynda bar múmkindikterdi tolyq paıdalana almaı júr.
Bul týraly búgin S.Seıfýllın atyndaǵy QazATÝ-diń 55 jyldyǵyna arnalǵan «Jas ǵalymdardyń Qazaqstannyń ındýstrııalyq-ınnovatsııalyq damýyndaǵy róli» atty forýmynda ýnıversıtet rektory Aqylbek Kúrishbaev málim etti.
«Memlekettiń alǵa qoıǵan mindetterin iske asyrýda, belgilengen maqsattarǵa jetýde jastarǵa artatyn úmit mol. Biraq, jastar áli de bolsa, ásirese ǵylym salasynda, bar múmkindikterdi tolyq paıdalana alyp júr dep aıta almaımyz. Aǵa býyn doktor, professorlardyń "kóleńkesinen" shyǵyp, qanattaryn erkin sermep ushyp kete almaı júr. Mamandardyń paıymdaýynsha, eldegi ǵylym doktorlarynyń 48 paıyzynyń jasy 60-tan asqan. Jalpy, ǵalymdardyń orta jasy - elý bes», - deıdi A. Kúrishbaev.
Rektor forým barysynda Elbasynyń qoldaýymen ǵylymdy qarjylandyrý úzdiksiz ósip otyrǵandyǵyn erekshe atap ótti.
«Ǵylymı zertteý jumystaryna 2011 jyly bıýdjetten bólingen qarjy kólemi 28,8 mıllıard teńge bolsa, 2012 jyly bul kórsetkish 49 mıllıard teńgege jetti, bul byltyrǵy jylmen salystyrǵanda 70% artyq. 2015 jyly ǵylymǵa bólinetin qarjy jalpy ishki ónimniń 1%, al 2020 jyly 1,5%-ǵa deıin jetkiziledi dep josparlanýda», - dep qorytyndylady sózin A. Kúrishbaev.
Aıta keteıik, forým joǵary oqý oryndaryndaǵy jas ǵalymdardyń ǵylymı jáne zertteý qyzmeti salasyndaǵy yntymaqtastyǵyn ári qaraı damytý maqsatynda ótti. Onyń barysynda Astana qalasynyń JOO-lary arasynda yntymaqtastyq ornatý týraly kelisimge qol jetkizildi.
