Jas ǵalym jobasy boıynsha ótinim qabyldaý merzimi uzardy

ASTANA. QazAqparat – «Jas ǵalym» jobasy boıynsha granttyq qarjylandyrýǵa arnalǵan konkýrstyń merzimi 14 qarashaǵa deıin uzardy. Bul týraly QazAqparat Ǵylym komıtetiniń resmı saıtyna silteme jasap habarlaıdy.

«Ǵylym jáne joǵary bilim mınıstrliginiń Ǵylym komıteti 2022 jyly 29 qyrkúıekte jarııalanǵan «Jas ǵalym» jobasy boıynsha 2023-2025 jyldarǵa arnalǵan jas ǵalymdardyń jobalaryn granttyq qarjylandyrýǵa arnalǵan konkýrstyń merzimi 2022 jylǵy 14 qarashaǵa deıin uzardy», - delingen málimdemede.

Atalǵan jobaǵa usynylatyn ǵylymı jumystardyń basym baǵyttary:

- Sý resýrstaryn, janýarlar men ósimdikter dúnıesin utymdy paıdalaný;

- Geologııa, mıneraldy jáne kómirsýtek shıkizatyn óndirý jáne qaıta óńdeý, jańa materıaldar, tehnologııa, qaýipsiz buıymdar men konstrýktsııalar;

- Energetıka jáne mashına jasaý;

- Jaratylystaný ǵylymdary salasyndaǵy ǵylymı zertteýler;

- Agroónerkásiptik keshenniń turaqty damýy jáne aýyl sharýashylyǵy óniminiń qaýipsizdigi;

- Ómir jáne densaýlyq týraly ǵylym;

- Aqparattyq, kommýnıkatsııalyq jáne ǵaryshtyq tehnologııalar;

- Áleýmettik jáne gýmanıtarlyq ǵylymdar salasyndaǵy zertteýler;

- Bilim jáne ǵylym salasyndaǵy zertteýler;

- Ulttyq qaýipsizdik, qorǵanys jáne mamandyrylǵan ǵylymı zertteýler.