Jas ǵalym mańǵystaýlyqtarǵa ózi oılap tapqan tyńaıtqyshty tanystyrdy

AQTAÝ. QazAqparat – Jas ǵalym Dáýlet Egemberdıev tozǵan egistik alqaptary men sory shyqqan jerlerdi qalpyna keltiretin tyńaıtqyshty mańǵystaýlyqtarǵa tanystyrdy, dep habarlaıdy QazAqparat tilshisi.

Dáýlet Egemberdıev usynǵan bıomelıorant tyńaıtqyshynyń quramy óte qarapaıym: jantaq, kóń jáne fosfogıps. Qoldanylatyn shıkizat jergilikti, qorshaǵan ortaǵa esh zııany joq ári shyǵyny az. Dástúrli ádis boıynsha qoldanylatyn 40 tonnaǵa deıingi fosfogıps pen qıdy 500 keli bıomelıorant almastyra alady.

«Tyńaıtqyshtardyń 40-tan astam túri bar. Keıbiri tozǵan egistik alqaptary men sory shyqqan jerlerdi qaıta qalpyna keltirýge arnalsa, keıbiri gúldemeı turǵan aǵashtarǵa arnalǵan. Qatty jelden gúli ushyp ketpeýge paıdasy zor. Barlyǵy da – ınnovatsııalyq ónimder», - deıdi ǵalym.

Bıomelıorant tuzdanǵan jerdi qaıta qalpyna keltirip, 5 paıyzǵa deıin qunarlylyǵyn arttyrady.