Jas ǵalymdarǵa páter berildi
ASTANA. KAZINFORM — Memleket basshysynyń tapsyrmasyna sáıkes jas ǵalymdar jańa páterge ıe boldy. Bul týraly QR Ǵylym jáne joǵary bilim mınıstrligi málim etti.
Búgin Almatyda «Ǵylym ordasy» ǵımaratynda Memleket basshysynyń tapsyrmasymen ǵalymdarǵa qoldaý kórsetý, olardyń áleýmettik mártebesin arttyrý jáne ǵylymǵa jas kadrlardyń kelýin yntalandyrý maqsatynda QR Ǵylym jáne joǵary bilim mınıstri Saıasat Nurbek jáne Ulttyq ǵylym akademııasynyń prezıdenti Aqylbek Kúrishbaev 9 jas ǵalymǵa páter sertıfıkattaryn saltanatty túrde tabystady.
QR Ǵylym jáne joǵary bilim mınıstrligi 2024 jylǵy mamyr aıynan bastap baspanaǵa muqtaj jas ǵalymdardyń (40 jasqa deıin qosa alǵanda) tizimin qalyptastyrý boıynsha jumys júrgizýde. Almaty qalasynda ornalasqan memlekettik organdarǵa vedomstvolyq baǵynysty ǵylymı uıymdar men joǵary oqý oryndarynan 300-ge jýyq ótinim kelip tústi.
Prezıdenttiń tapsyrmasyn oryndaý maqsatynda Almaty qalasynda baspana berý úshin ǵylymı uıymdardyń, joǵary jáne joǵary oqý ornynan keıingi bilim berý uıymdarynyń jas ǵalymdary úshin páterlerdi bólý jónindegi komıssııa baspanaǵa muqtaj jas ǵalymdardyń kezekti tizimin aıqyndady.
Jas ǵalymdar kórsetilgen qoldaý úshin alǵystaryn bildirdi. Sondaı-aq olar endi turǵyn úı máselesin sheshýge alańdamaı, ǵylymı jumystarǵa kóbirek ýaqyt bóle alatynyn aıtty.
– Bul – jas ǵalymdarǵa úlken qoldaý. Jastardyń ǵylymmen aınalysýyn yntalandyrýǵa baǵyttalǵan osy baǵdarlamanyń iske qosylǵanyna qýanyshtymyn. Bul ǵylymdy ilgeriletý jolyndaǵy mańyzdy qadam ekenine senimdimiz, – dep atap ótti Baljan Naımanova, J.Jıembaev atyndaǵy Qazaq ósimdikterdi qorǵaý jáne karantın ǵylymı-zertteý ınstıtýtynyń ǵylymı qyzmetkeri.
QR Ǵylym jáne joǵary bilim mınıstrligi bul jumysty kezeń-kezeńimen júrgizýde. Jas ǵalymdar sanynyń artýy ǵylymnyń damýyna, ǵylymı jáne ǵylymı-tehnıkalyq qyzmet nátıjelerin kommertsııalandyrýǵa, sondaı-aq jańa ekonomıkalyq klasterler qurýǵa oń áser etedi.
Aıta keteıik, buǵan deıin Memleket basshysynyń tapsyrmasymen 42 jas ǵalym turǵyn úı sertıfıkattaryn aldy. Sonymen qatar 2023 jylǵy 19 qazanda QR Ǵylym jáne joǵary bilim mınıstrligi men «Otbasy bank» AQ arasynda jas ǵalymdarǵa 2023-2027 jyldarǵa arnalǵan jeńildetilgen kredıt berý baǵdarlamasy boıynsha yntymaqtastyq týraly kelisimge qol qoıdy. Qazirgi ýaqytta atalǵan baǵdarlama boıynsha 290 jas ǵalym jeńildikpen baspana aldy.
Eske sala keteıik, buǵan deıin otandyq ǵylym men joǵary bilimdi tsıfrlandyrý protsesi qalaı júrip jatqanyn jazǵan bolatynbyz.