Jas ǵalymdarǵa baspana berildi

ASTANA. KAZINFORM — QR Ǵylym jáne joǵary bilim mınıstri Saıasat Nurbek 10 jas zertteýshige jańa páterlerdiń sertıfıkatyn saltanatty túrde tabys etti. Bul bastama — otandyq ǵylymnyń áleýetin arttyrýǵa jáne talantty mamandardyń áleýmettik jaǵdaıyn jaqsartýǵa baǵyttalǵan mańyzdy qadam. Bul týraly Ǵylym jáne joǵary bilim mınıstrligi málim etti. 

Memleket basshysynyń jas ǵalymdardy qoldaý jónindegi tapsyrmasy naqty istermen jalǵasyn taýyp jatyr.

Baspanaly bolǵan ǵalymdardyń qatarynda L. N. Gýmılev atyndaǵy EUÝ bıotehnologııa jáne mıkrobıologııa kafedrasynyń dotsent m. a. Jadyrasyn Nurbekova bar. 

— Ǵylymǵa stýdenttik kezden kelip, búgin sonyń jemisin kórip otyrmyn. Mundaı qoldaý jas mamandarǵa úlken serpin beredi, — deıdi ǵalym.

Memleket tarapynan kórsetiletin bul kómek jas ǵalymdardyń turmystyq máselesin sheship, olardyń jańa ǵylymı jobalarǵa erkin shoǵyrlanýyna jol ashady.

Memleket basshysynyń tapsyrmasyna sáıkes páter ıeleri qatarynda S. Seıfýllın atyndaǵy Qazaq agrotehnıkalyq zertteý ýnıversıteti Energetıka ınstıtýtynyń «Elektr tehnıka jáne avtomattandyrý» bilim berý baǵdarlamalary tobynyń qaýymdastyrylǵan professory Ermek Sarsıkeev bar.

Ol ǵylymı-pedagogıkalyq qaýymdastyqqa jan-jaqty qoldaý kórsetip otyrǵany úshin shynaıy alǵysyn bildirip, jasalyp jatqan jaǵdaılar kásibı turǵyda ósýge, ǵylymdy damytýǵa jáne Qazaqstandaǵy bilim berý sapasyn arttyrýǵa jańa múmkindikter ashatynyn atap ótti. Onyń aıtýynsha, mundaı sharalar – adam kapıtalyna basymdyq berilip otyrǵanynyń, ǵylymı áleýetti nyǵaıtýdyń jáne jas ǵalymdar men oqytýshylardy jańa jetistikterge yntalandyrýdyń aıqyn kórinisi.

Buǵan deıin 50 ǵalymǵa «Úzdik ǵylymı qyzmetker» syılyǵy berilgenin jazǵan edik.