Jas ǵalymdardyń zertteýine bólinetin grant sany kóbeıedi – Memleket basshysy

ALMATY. KAZINFORM – Memleket basshysy Qasym-Jomart Toqaev eńbek adamynyń mártebesin kóterý týraly aıtty. Bul týraly Aqordanyń baspasóz qyzmeti málim etti. 

«Taǵy bir másele. Men eńbek adamynyń mártebesin kóterý týraly únemi aıtyp júrmin. Ótken bes jyldyń ishinde bul baǵytta kóp sharýa atqaryldy. Tıisti zańdarǵa ózgerister engizildi. Jalaqy kóterildi. Basqa da áleýmettik qoldaý sharalary qolǵa alyndy. Memlekettik marapattar naǵyz eńbek adamyna tapsyrylyp jatyr. Osyndaı naqty jumystyń nátıjesinde túrli mamandyq ıeleriniń bedeli arta tústi. Mamandyqtyń jamany joq. Elimiz úshin barlyq kásip ıeleri qajet. Óz isiniń has sheberi atanǵan adam mindetti túrde tabysqa jetedi. Túptep kelgende, bul – qoǵamda eńbekqorlyq pen kásibı biliktilikti jappaı dáripteý degen sóz. Básekege qabiletti ult bolý úshin qoǵamda osy qundylyqtar ornyǵýy qajet», - dedi prezıdent. 

Sondaı-aq, memleket basshysy ǵalymdarmen kezdesý barysynda ǵalymdardyń mártebesin kóterý jóninde de aıtty. 

«Biz ǵalymdarǵa jaǵdaı jasaý kerek dep jıi aıtamyz. Bul – qur sóz emes. Memleket tarapynan naqty jumys jasalyp jatyr. Aldaǵy eki jylda jas ǵalymdardyń zertteýine bólinetin grant sany taǵy da kóbeıedi. Bıýdjetten 18 mıllıard teńge bólinedi. Byltyr 284 jas ǵalym baspana aldy. Bıyl meniń tapsyrmammen olarǵa taǵy 200 páter beriletin boldy. Osyndaı naqty sharalar arqyly elimizdegi ǵylymdy jáne jalpy ǵalymdar qaýymyn qoldaý jumysy aldaǵy ýaqytta da jalǵasyn tabady», - dedi Qasym-Jomart Toqaev.