Jas fýtbolshylar halyqaralyq týrnırde chempıon atandy
ShYMKENT. QazAqparat - Ońtústik Qazaqstan oblystyq fýtbol mektebiniń tárbıelenýshileri Ońtústik Koreıada ótken halyqaralyq týrnırde chempıon atandy. Mundaı jeńis tústiktiń ár jyldardaǵy balǵyn sportshylaryna 25 jyldan keıin endi buıyryp otyr, dep habarlaıdy QazAqparat HAA tilshisi.
Shymkenttegi «Lokomatıv» stadıonynda fýtbol mektebiniń ujymy Koreıadan oralǵan jastarǵa qurmet kórsetti. Osydan bir apta buryn jalaýy kóterilgen Azııa lıgasyndaǵy halyqaralyq týrnırde kúngeılik sportshylardyń top jarýy ońaı bolǵan joq. Óıtkeni, munda álemniń eń myqty degen 24 komandasy baq synady. Fýtbolshylar 8 oıyn ótkizip, onyń altaýynda jeńiske jetti. Bul - ońtústikqazaqstandyq aıaq dop sheberleriniń shyǵys Azııaǵa jasaǵan alǵashqy sapary bolatyn.
Jas fýtbolshylar jartylaı fınalda koreıalyq «Baıol naıven» komandasymen oınap, 2:0 esebimen utty. Bul jetistik olardyń fınalǵa shyǵýyna múmkindik berdi. Aqtyq oıynda koreıalyq chempıondarmen kezdesip, 1:0 esebimen jeńiske jetken.
Ońtústik Koreıanyń Ýldjın qalasynda ótken týrnırde 12 jasar Sanjar Ergesh «Koreıanyń úzdik qorǵaýshysy» atandy. Sport mektebiniń túlekteri bul jarystan bólek, basqa dodalarda da úzdikter qatarynan kórindi. Dene shynyqtyrý jáne sport basqarmalary arasynda ótken Qazaqstan chempıonatynda 12 komandanyń ishinen bas júldeni jeńip alǵan bolatyn. Sondaı-aq, Fýtbol federatsııasynyń uıymdastyrýymen Qostanaı qalasynda ótken Qazaqstan birinshiliginde birinshi oryn tuǵyrynan kóringen edi.
