Jas dızaıner ulttyq naqyshtaǵy kıimderdi álemdik naryqqa shyǵarmaq
25 jastaǵy Medına Saqtaǵanova «qazaqtyń san ǵasyrlyq tarıhy tunǵan qolónerimizdi dúnıejúzine tanytsam» deıdi. Qazirdiń ózinde Italııa, Shotlandııa turǵyndarynan suranys túsken. Іsker boıjetken bıyl jastarǵa jyl arnap, qoldaý tanytqan Elbasyǵa Mańǵystaý jastary atynan shapan tigip bermek.
«Birinshi synypta júrgende anama kómektesip, oıý qıǵandarym esimde. Jáne mekteptiń kezeńderinde sabaqta ózimniń sabaǵymdy aıtyp bolǵannan keıin partama kelip, sýret salyp otyratynmyn. Árdaıym sýret salǵanda peıjaz, tabıǵat emes, qýyrshaqtardyń, kıimderdiń úlgilerin salatynmyn», - deıdi jas dızaıner.
Medına Saqtaǵanova kıim piship, ony tigýdi anasynan úırengen. Bala kezindegi qolónerge degen qyzyǵýshylyq onyń kásibı sánger atanýyna jol ashty. Joǵary oqý ornyn bitirgen jas maman 22 jasynda kıim tigý sheberhanasyn ashyp, jeke kásibin bastaıdy. Úsh jyl ishinde isker boıjetken tolaǵaı tabysqa jetip úlgerdi.
«Qazaq kıimin, ónerin men qoldamasam nemese siz qoldamasańyz, ol joǵalyp ketedi. Qazaǵymyzdyń óneri, dástúri umytylmas úshin osy jylǵa deıingi jınap-tergen, anamnan alǵan tájirıbemdi halyqqa arnap, erte zamandaǵy oıýlarymyzben qazirgi zamanaýı sán úlgisin úılestirip, óte keremet týyndylar shyǵarýdamyz», - dep atap ótti kásipker Medına Saqtaǵanova.
Tigin sheberhanasynda negizinen ulttyq naqyshtaǵy kıimder tigiledi. Qazir uzatylatyn qyzdarǵa arnalǵan kóılekter, sáýkele, áıelder qamzoly men beshpetke úlken suranys bar. Oıýlanyp, órnektelgen kúndelikti kıetin kıimder de tigilip jatyr. Munda qolynan is keletin 15 adam eńbek etýde.
«Sheberhana ashylǵaly osynda eńbek etip kele jatyrmyn. Medınadaı isker, eńbekqor qyzdyń komandasyna tap bolǵanyma qýanamyn. Kıimderdiń úlgisin ózi salady. Bizdegi kóp jumys qolmen jasalatyndyqtan, asa uqyptylyqty qajet etedi. Onyń ústine arýlarǵa arnalǵan kıimder bolǵandyqtan barynsha ásemdep tigýge tyrysamyz», - deıdi tiginshi Aelıta Qoshekenova.
Medına aldaǵy aıda Aqtaýǵa álemge tanymal sán salasynyń sheberlerin shaqyrtpaqshy. Sheberhanadaǵy qyzmetkerlermen birge ózi de germanııalyq mamandardan dáris alyp, biliktiligin arttyrmaq.
«Bizdiń Elbasy osy 2019 jyldy Jastar jyly dep atady. Osyǵan oraı ózimniń atymnan, Mańǵystaýdyń atynan keremet ulttyq naqyshpen tigilgen shapan syılaǵym keledi», - dep túıdi sózin jas kásipker.
Іsin jańa bastaǵan jas kásipkerdiń alǵa qoıǵan maqsaty aýqymdy. Qazaqtyń órnegi bar kıimderdi álem jurtshylyǵy kıip júrse degen armany bar. Bıyl shetelderde ótetin sán aptalyqtaryna qatysyp, tájirıbe almasýdy josparlap otyr.
Foto: mangystaumedia.kz
