Jas dıplomattarǵa latyn álipbıi úıretiledi

ASTANA. QazAqparat - Qazaq tili latyn álipbıine kóshiriletinine baılanysty elimizdiń jas dıplomattaryna arnaıy kýrs bastalady. Bul týraly búgin «Qazaqstan dıplomatııasynyń jańa esimderi» atty kitaptyń tanystyrylymynda QR Syrtqy ister mınıstriniń orynbasary Roman Vasılenko aıtty, dep habarlaıdy QazAqparat tilshisi.

«Latyn álipbıine josparly túrde ótý maqsatynda aǵymdaǵy jyly Memlekettik basqarý akademııasymen jas dıplomattarymyzǵa arnalǵan arnaıy oqytý kýrsyn bastaımyz», - dedi vıtse-mınıstr.

Sonymen qatar ol jyl saıyn Syrtqy ister mınıstrliginde jas dıplomattardyń memlekettik jáne shetel tilin bilý deńgeıin kóterýge baǵyttalǵan arnaıy kýrstar uıymdastyrylatynyn atap ótti.

«Máselen, ıspan, aǵylshyn jáne basqa da tilder tildiń tasymaldaýshysy sanalatyn kásibı oqytýshylardy shaqyrý arqyly oqytylady. Qyzmetkerler turaqty túrde attestatsııadan ótkiziledi. Onyń barysynda keleshegi zor jastardy anyqtaımyz jáne olardy qoldaýǵa jáne ilgeriletýge tyrysamyz», - dedi ol.

Roman Vasılenko aǵymdaǵy jyly bas dıplomattar Germanııa, Japonııa, Mysyr, Frantsııa syndy elderde 10-nan astam halyqaralyq taǵylymdamadan ótetinin aıtty. Bul jumys elimizdiń Syrtqy ister mınıstrliginiń ne bolmasa shaqyrýshy taraptyń qarajaty esebinen júrgiziletin bolady.

«Buǵan qosa, 2019 jyldyń 1-5 shildesi aralyǵynda Londonda ótetin jas dıplomattar forýmyna jastarymyzdy jiberý máselesin pysyqtap jatyrmyz», - dedi QR SІM orynbasary.

Aıta keteıik, búginde Syrtqy ister mınıstrliginiń 289 jas dıplomat jumys isteıdi.