Jas dıplomat Áıgerim Seısembaeva: Dıplomat adamdardyń júregin jaýlaı bilýi kerek

ASTANA. QazAqparat - Qazaqstan Respýblıkasynyń Syrtqy ister mınıstrligi Qazaqstannyń dıplomatııalyq qyzmetiniń 26 jyldyǵyna oraı «Dıplomatııanyń 26 jańa esimderi» atty aqparattyq jobany júzege asyra bastady. Joba dıplomatııalyq qyzmettiń jas qyzmetkerlerin yntalandyrý men dıplomat mamandyǵynyń bedelin odan ári nyǵaıtýdy kózdeıdi. Osyǵan baılanysty QR SІM-niń «Feısbýk» áleýmettik jelisindegi resmı paraqshasynda Qazaqstannyń sheteldik mekemelerinde jáne vedomstvonyń ortalyq apparatynda qyzmet isteıtin keleshegi bar jas dıplomattar týraly aqparat ornalastyrylyp keledi. Solardyń biri QR Syrtqy ister mınıstrligi Halyqaralyq aqparat komıtetiniń ekinshi hatshysy Áıgerim Seısembaeva.

- Nelikten dıplomat mamandyǵyn tańdadyńyz?

- Dıplomat bolýdy bala kezimnen armandaǵan edim. Bul mamandyq men úshin árdaıym sheber ári ásem ónerdiń sınonımy bolǵan. Meniń oıymsha, shynaıy dıplomat bilimdi, jaqsy ázil-ospaq sezimi bar, kez kelgen adamdy óz kózqarasynyń durystyǵyna sendire otyryp, óz memleketiniń jáne otandastarynyń múddelerin ilgeriletýge septigin tıgizetin adam. Kásiptik qyzmetimniń bir kezeńinde osy ónerdi tolyqtaı ıgere alamyn dep úmittenemin.

- Qazirgi qyzmetińizde qandaı mindetterdi atqarasyz?

- Dıplomatııalyq qyzmette bolǵan ýaqyt boıy men Qazaqstannyń oń ımıdjin shetelde ilgeriletý, ıaǵnı pıar salasynda jumys istedim. Buǵan buqaralyq aqparat quraldarymen jumys isteý, sheteldikter aýdıtorııasyna arnalǵan materıaldardy daıyndaý, belgili oqıǵalar týraly SІM-niń ustanymyn qalyptastyrý kiredi. Bul sala óte aýqymdy jáne saıasat, ekonomıka, mádenıet, sport jáne t.b. salalarynda habardar bolýdy talap etedi. Meniń oıymsha, bul sala eń qyzyqty ári serpindi.

- Jumysyńyzdaǵy eń qyzyqty áserli epızod týraly aıtyp berińiz.

- Joǵaryda aıtqanymdaı, dıplomatııalyq qyzmet salasy óte qyzyqty. Ol tynyshtyq pen birqalyptylyqqa oryn qaldyrmaıdy. Biz árdaıym jınaqy, jyldam ári kez kelgen fors-majorǵa daıyn bolýymyz kerek. Keıbir áriptesterim tipti kez-kelgen tapsyrmany oryndaýdyń merzimi keshe bolǵan dep qaljyńdaıdy. Bul fraza qyzmetimizdiń ereksheligin aıqyn kórsetedi. Sondyqtan bizdiń qyzmetimiz árqashan da qyzyqty, kóńil tolqytatyndaı áserli dep aıtýǵa bolady.

- Kásibı qazaqstandyq dıplomattyń ımıdjin qalaı sıpattaıtyn edińiz?

- Meniń oıymsha, munda ımıdjdi aıtý tolyqtaı durys emes. Eń aldymen, dıplomattyń kórinýi emes, bolýy kerek. Adal, bilimdi, eńbekqor, jaýapty jáne óz isin bilýi kerek. Sondaı-aq, adamdardyń júrekterin bıleý qabileti de mańyzdy. Sonymen birge, kem degende bir shet tilin tolyqtaı meńgermegen qyzmetker dıplomat dep atana alady ma?

- Kelesi 26 jyl ishinde Qazaqstannyń halyqaralyq pozıtsııasyna qatysty kózqarasyńyz týraly aıtyp berińiz.

- Táýelsizdik jyldarynda Qazaqstan halyqaralyq arenada bedeldi orynǵa ıe boldy. Buǵan memleketimizdiń oılastyrylǵan kópvektorly saıasaty men búkil álemde beıbitshilik pen qaýipsizdikti alǵa jyljytýǵa umtylysy úles qosty. Aldaǵy 26 jylda Qazaqstannyń halyqaralyq isterdegi róli odan da nyǵaıa túsedi degen oıdamyn.