Jas dárigerlerdi aýylǵa jumysqa baǵyttaýdy qarastyratyn zań jobasy ázirlendi - S.Qaıyrbekova
ASTANA. 25 aqpan. QazAqparat /Gúlmıra Álıakparova/ - Medıtsınalyq joǵary oqý ornynda grant boıynsha bilim alyp shyqqan jas dárigerdi úsh jylǵa aýylǵa jumysqa baǵyttaýdy qarastyratyn zań jobasy ázirlendi.
Bul týraly búgin «b-news» portalynda QR Densaýlyq saqtaý mınıstri Salıdat Qaıyrbekovamen ótken on-laın konferentsııada málim boldy.
S.Qaıyrbekovanyń pikirinshe, jas dárigerlerdi aýylǵa jumysqa jiberý máselesi normatıvti túrde rettelýi qajet. Sol sebepti, jas dárigerge oqýyn támamdaǵannan keıin memlekettik shyǵyndy úsh jyl boıǵy jumysymen mınıstrlik nusqaǵan jerde óteýdi mindetteıtin tarmaq QR «Bilim týraly» zań jobasyna engizilip, ol búgingi kúni Májiliste qaralyp jatyr. «Kezinde ózimiz de joldamamen jumysqa barǵanbyz», - deıdi mınıstr.
Al eger stýdent (grant boıynsha bilim alǵan) joldama boıynsha jumys isteýden bas tartsa, atalmysh zań jobasyna engizilgen jańa tarmaqqa sáıkes, odan memlekettiń jumsaǵan shyǵyny tolyǵymen óndirip alynady.
«Zańnyń keri kúshi joq. Biz úshin bıylǵy jyl asa mańyzdy da, jaýapty», - deıdi mınıstr.
Dáriger bolýdy qalaǵan aýyl jastaryna toqtalǵan S.Qaıyrbekova, medıtsınalyq mamandyqtarǵa bólinetin barlyq bilim granttarynyń 30 paıyzy aýyl jastaryna tıesili ekendigin aıtty. «Olardy kvotany alǵan eldi mekende jumys isteýge mindetteıtin qaýly qabyldandy», - deıdi ol.
Vedomstvo basshysynyń sózine qaraǵanda, endi óńirlerdegi densaýlyq saqtaý basqarmalary bastyqtarynyń orynbasarlary qansha jáne qandaı stýdent qaı aýylǵa baryp jumys isteıtindigi týraly málimetterdi aldyn ala jınaıtyn bolady. «Olar jataqhanalarda bolyp, áńgimelesip, jumysqa jiberiletin medıtsınalyq nysandardy aldyn ala kórsetýi tıis», - dedi.
