Jas býynnyń dástúrli nekege kózqarasy qandaı – áleýmettik zertteý
ASTANA. KAZINFORM – El jastarynyń dástúrli neke degen kózqarasy eki túrli. Arnaıy júrgizilgen saýalnama nátıjesi óńirler arasyndaǵy pikir alshaqtyǵyn kórsetken. Bul týraly «Jastar» ǵylymı-zertteý ortalyǵynyń dırektory Gúlishan Nahbaeva Jibek Joly arnasyndaǵy «Búgin LIVE» baǵdarlamasyna bergen suhbatynda málimdedi.
- Sońǵy on jylda jastar úshin basty qundylyqtardyń biri retinde otbasy men densaýlyq máseleleri aldyńǵy orynǵa shyqqan. Degenmen otbasy qundylyǵyna qatysty óńirler arasyndaǵy kózqaras ártúrli. Saýalnama nátıjesi boıynsha, Mańǵystaý oblysy men Shymkent qalasynyń jastary dástúrli nekeni júz paıyz qoldaıdy.
Al Shyǵys Qazaqstan jáne Jetisý oblystarynda bul pikirdi jastardyń shamamen elý paıyzy ǵana quptaǵan, - deıdi maman.
Sondaı-aq 2025 jyly «Jastar» ǵylymı-zertteý ortalyǵy óńirler boıynsha arnaıy taldaý júrgizdi. Saýalnama nátıjelerin saraptaı kele, jas býynnyń materıaldyq qundylyqtarǵa degen kózqarasy anyqtalǵan.
- Bizdiń ortalyq 2025 jyly arnaıy zertteý júrgizdi. Taldaý nátıjesinde qazirgi jastardyń negizgi suranystary aıqyndaldy. Atap aıtqanda, jas býyn úshin eń basty másele – baspana.
Al ekinshi orynda turaqty jumysqa ornalasý tur. Bul jastardyń eń aldymen áleýmettik turǵyda ornyǵyp, bolashaǵyna senimdi bolýdy qalaıtynyn kórsetedi, - dedi ortalyq jetekshisi.
Aıta keteıik, Konstıtýtsııada er men áıel arasyndaǵy nekeni bekitý sharttary aıqyndaldy.
