Jas býhgalter 6 mıllıon jymqyramyn dep, 6 jylǵa sottaldy
ÓSKEMEN. QazAqparat - Semeı qalalyq soty Znamenka aýyly mektebiniń 27 jastaǵy esepshisin alty jylǵa bas bostandyǵynan aıyryp, bilim berý bólimine mektep qazynasynan urlanǵan 6 mıllıon teńgeni qaıtaryp berýge mindettedi. Ol sot zalynda qamaýǵa alyndy, dep habarlaıdy «QazAqparat» HAA tilshisi.
Znamenka aýylynyń mektebinde jumys istegen jas býhgalter bul qyzmetke dekrettik demalysqa ketken mamannyń ornyna ýaqytsha kelgen. Boıjetken qyz mektep qyzmetkerleriniń barlyq qarjylyq esebin júrgizip, eki jyldyń ishinde óziniń shotyna 6 mln teńge aýdaryp úlgergen. Bul aqsha muǵalimderdiń eńbekke jaramsyzdyq paraǵy men eki bos orynnyń jalaqysy esebinen únemdelgen. Alǵashqyda, esepshi óziniń shotyna 50 myń teńgeden jiberip otyrǵan, keıin bul somany 100 myń teńgege deıin arttyrǵan.
«Boıjetken qalalyq bilim berý bólimine qarjylyq esepti óz ýaqytynda tapsyryp otyrǵan, qarjylyq aıla-amaldar týraly eshkim kúdiktenbegen. Mekteptiń turaqty esepshisi dekrettik demalystan shyqqannan keıin barlyq qujattardy teksergen jáne kúdikti «qarjylyq áreketterdi» anyqtaǵan»,- dep atap ótti qalalyq sottan.
