Jas áıelder arasynda jumystan shyǵyp qalý úreıi bar - Raýshan Sársembaeva
ASTANA. QazAqparat - Qazaqstanda genderlik teńsizdiktiń belgileri bar. Bul týraly búgin Ortalyq kommýnıkatsııalar qyzmetindegi brıfıngte Qazaqstannyń isker áıelderi qaýymdastyǵynyń tóraıymy Raýshan Sársembaeva málim etti.
«Bundaı jaǵdaı júkti jáne eńbek tájirıbesi joq jas áıelderdi, sondaı-aq qyryq jastan asqan áıelderdi jumysqa qabyldaý men shyǵarý kezinde baıqalýda. Zeınetkerlik jasqa jaqyndaǵan áıelderdiń jumysqa ornalasýynda keıbir qıyndyqtar bar», - dedi ol.
Onyń sózine qaraǵanda, jumysqa ornalasý turǵysynda turmys qurǵan jas qyzdar arasynda búginde úreı paıda bolǵan.
«Maǵan jumystaǵy jas qyzdar kelip, «jaqynda kúıeýge shyqtym, meni jumystan shyǵarmaısyz ba?» dep suraǵan kezder boldy. Bul barlyq jerlerde bar másele jáne ol jarııa etilmeıdi. Osy oraıda jas áıelder arasynda bundaı úreı bar. Biz tıisti túsindirý jumystary barysynda olardyń quqyqtaryn qorǵaý jumystaryna erekshe mán bermekpiz. Baılanys jelisin ashamyz, oǵan kez kelgen aýyldan telefon shalyp, keńes alýǵa múmkindik bolady», - dedi ol.
