Jas atletter Olımpıadanyń 4 joldamasyn jeńip aldy
Alǵashqy jarys kúni úsh jerlesimiz joldamaǵa ıe boldy. Olar: Efım Tarasov (400 m), Anastasııa Glýhareva (úsh qarǵyp sekirý), Aleksandra Zalıýbovskaıa (400 m).
Jasóspirimder arasyndaǵy Olımpıada oıyndary qazan aıynda Argentına astanasy Býenos-Aıreste ótedi. Osyǵan baılanysty irikteý qurlyqtyq irikteý Bangkok qalasynda uıymdastyryldy.
Uldardan Taılandqa 10 sportshy barǵan. Olardan tek 400 metrge júgirgen Efım Tarasov joldamaǵa ıelik etti. Bul qashyqtyqta Tarasovpen birge Kırıll Grıgorıan júgirgen.
Efım fınalda márege 48.99 sekýndta jetti. Ol tek shrı-lankalyq Madýsan Bogodadan qalyp qoıdy (48.58 sek.). Bes orynǵa deıin kvota qarastyrylǵan.Alǵashqy joldama elimizden Tarasovqa buıyrdy. Grıgorıan jetinshi kelgendikten, lıtsenzııadan tys qaldy.
Al qyzdar arasyndaǵy 400 metrge júgirýden Azııa qurlyǵyna tek eki kvota bólgen. Alty sportshy talasqan joldama qytaılyq Rao Tsınıý (55.78 sek.) men qazaqstandyq Aleksandra Zalıýbovskaıaǵa (56.21) buıyrdy. Otandasymyz qatysýshylardyń arasyndaǵy eń jasy. Ol óziniń jeke rekordyn 0,18 sekýndqa jańartyp, márege ekinshi keldi.
Úsh qarǵyp sekirýden de eki joldamanyń bireýin qazaqstandyq atlet jeńip aldy. Anastasııa Glýhareva ózine berilgen múmkindikterdiń birinde 12.70 metrge sekirdi. Bul onyń jeke rekordy. Ózbekstandyq Roksana Hýdoıarova osy saıystyń jeńimpazy atandy (13.21 m).
Bıylǵy jyly respýblıkalyq mektepter arasyndaǵy spartakıadada top jarǵan Anastasııa Trıfonova200 metrge júgirýden Qazaqstan quramasyna tórtinshi joldamany syılady.
Іrikteýde 16 jastaǵy sportshy atalǵan qashyqtyqty 25.34 sekýndta júgirip, márege tórtinshi kelgen. Fınalda besinshi oryn aldy (25.68). Degenmen Argentına astanasyndaǵy jasóspirimder arasyndaǵy Olımpıada oıyndaryna barýǵa bul kórsetkishi jetkilikti boldy.
