Jas astanalyqtar II Halyq oıyndary festıvaline qatysty

ASTANA. QazAqparat - Astana qalasynyń etnomádenı birlestikteriniń jáne aýla klýbtarynyń ókilderi «Jastar» saraıynda bas qosty. II Halyq oıyndary festıvalinde komandalar eresek jastaǵy jáne kishi jas sanattarynda sheberlik baıqasty. Jalpy, oıynǵa 66 bala qatysty, dep habarlady qala ákiminiń resmı saıty.

Shara aıasynda asyq atý, arqan tartý syndy qazaq ulttyq oıyndary, tatardyń ulttyq oıyny - «kóıantá - chılák belán ıógerú» (ıinaǵashpen júgirý), bashqurt halqynyń «ıomortkany ҡalaҡkahalyp ıúgereú» (jumyrtqany qasyqqa salyp júgirý), belarýs halqynyń kartop egý, tájiktiń «Aspakbozı» (at qulaǵynda oınaý) sııaqty oıyndarynan jarystar uıymdastyryldy.

Sondaı-aq elordalyq etnomádenı birlestikterdiń shyǵarmashylyq ujymdary men shaqyrylǵan ártister óz ónerlerin ortaǵa saldy. Oıynǵa qatysýshylar dıplomdarmen jáne baǵaly syılyqtarmen marapattaldy.

Osy sııaqty sharalar Qazaqstanda turyp jatqan etnostardyń salt-dástúrlerin qurmetteýge negizdelgen ulttyq birlik pen etnosaralyq qarym-qatynasty nyǵaıtýǵa septigin tıgizedi.