Jas áskerıler Kúlásh Baıseıitova shyńyn baǵyndyrdy
ALMATY. QazAqparat - Almaty qalalyq áskerı-patrıottyq klýbynyń órenderi Kúlásh Baıseıitova shyńyna Qazaqstannyń kókbaıraǵyn tikti, dep habarlaıdy QazAqparat tilshisi.
Jasóspirimder teńiz deńgeıinen 3500 metr bıiktikte jatqan shyńdy baǵyndyrdy.
Qalalyq «Kırov» áskerı-patrıottyq klýbynyń túlekteri Qazaqstannyń memlekettik týyn Táýelsizdik kúni qarsańynda K.Baıseıitova shyńyna, halyqqa belgili Shymbulaqqa qoıdy.
Bul jastardyń búkil qazaqstandyqtarǵa 16 jeltoqsan - Qazaqstannyń Táýelsizdik kúnine oraı tartqan tartýy.
11 jáne 18 jas aralyǵyndaǵy jetkinshekter alpınızmmen jáne shyńdy baǵyndyrýmen shuǵyldanady. Jas alpınıster shyńǵa kóterilý úshin alty aılyq qajetti daǵdylardy meńgergen.
Olarǵa jeńil atletıkalyq jáne arnaıy jattyǵýlardan keıin ǵana taýǵa shyǵýǵa ruqsat etildi.
Qysta shyńǵa shyǵýdan buryn, balalar eń aldymen teńiz deńgeıinen 4000 metr joǵary ornalasqan kishigirim taýlarǵa jol tartady. Al sodan keıin fızıkalyq, taktıkalyq shynyǵyp, sheberlikti jınaqtaı otyryp, tórt jarym myń metrge deıin jetedi.
Jas jaýyngerlerdiń vzvody taý-ken jáne alpınızm boıynsha jattyǵýlarǵa arnalǵan jeti kúndik jattyǵý daıyndyǵynan ótti.
Olarmen tájirıbeli alpınıster komandasy «Kırov» áskerı-patrıottyq klýbynyń jetekshisi taý týrızmi men alpınızminde 16 jyl tájirıbesi bar Baqytjan Pirimbet, «Shymbulaq» taý shańǵysy kýrortyn qutqarýshysy Pavel Maıorov pen medıtsınalyq qyzmet leıtenanty Natalıa Ostrovskaıa birge júrdi.
Kúlásh Baıseıitova shyńyna kóterilý 9 saǵatqa sozyldy. Aýa raıynyń qolaısyzdyǵyna qaramastan, jastar tapsyrmany oıdaǵydaı oryndady. Oqýshy Karına Rýbannyń aıtýynsha, Qazaqstannyń týyn taý shyńynda Táýelsizdik kúnine oraı kóterý - jas patrıottar úshin úlken jaýapkershilik jáne úlken abyroı.
Búgingi tańda jasóspirimder baǵyndyrǵan Panfılov, Pıonerler, Amangeldi, Molodejnyı, Keńester, Komsomol, Fýrmanov jáne Panorama shyńdarynyń qataryna Kúlásh Baıseıitova shyńy qosyldy.
