Jas áskerı dárigerlerge ofıtserlik shen men qos dıplom tabystaldy
ASTANA. KAZINFORM – Eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteriniń áskerı ınstıtýtynda medıtsınalyq qyzmet ofıtserlerine alǵashqy ofıtserlik ataq berý rásimi saltanatty jaǵdaıda ótti.
Bıyl alǵashqy 12 ıntern-túlek ofıtserlik ataq aldy. Oqýyn aıaqtaǵan jas ofıtserlerge Áýe qorǵanysy kúshteriniń áskerı ınstıtýty men Marat Ospanov atyndaǵy Batys Qazaqstan medıtsına ýnıversıtetiniń dıplomdary tabystaldy. Bul olardyń áskerı jáne joǵary medıtsınalyq bilimdi qatar meńgergenin rastaıdy.
Áýe qorǵanysy kúshteri áskerı bilim ordasynyń bastyǵy avıatsııa general-maıory Tımýr Espaǵanbetov ınstıýtta joǵary bilikti áskerı mamandar daıarlaıtynyn, sonymen qatar kásibı quzyretterdi qalyptastyrýǵa jáne áskerı boryshty adal oryndaý úshin jaýapkershilikke tárbıeleýge erekshe kóńil bólinetinin atap ótti.
– Oqý barysynda alǵashqy medıtsınalyq, dárigerge deıingi jáne mamandandyrylǵan medıtsınalyq kómek kórsetý negizderin meńgerdik. Meniń «jalpy áskerı praktıka dárigeri» mamandyǵym boıynsha oqý merzimi alty jyldy quraıdy. Qazirgi tańda bes jyldyq bakalavrıat baǵdarlamasyn aıaqtadym, al alda – bir jyldyq ınternatýra kezeńi kútip tur, – dedi túlek, leıtenant Bekjan Ámirov.
Medıtsınalyq qyzmet ofıtserleriniń alǵashqy legi 2020 jyly oqýdy bitirgen bolatyn. Sol jyly 15 áskerı dáriger alǵashqy ofıtserlik ataqqa ıe boldy. 2021 jyly ınstıtýt 23 mamandy daıarlap shyǵarsa, bıyl «jalpy praktıka dárigeri» mamandyǵy boıynsha bilim alǵan 12 túlek ofıtser pogonyn taqty.
Oqýdy aıaqtaǵan jas ofıtserler áskerlerdi medıtsınalyq qamtamasyz etý, bilikti medıtsınalyq kómek kórsetý jáne áskerı qyzmetshilerdiń densaýlyǵyn saqtaý mindetterin turaqty ornalasý pýnktterinde de, jaýyngerlik mindetterdi oryndaý barysynda da atqaratyn bolady.
Aıta ketelik Qarýly kúshter tarıhynda tuńǵysh ret kıberqaýipsizdik ofıtserleri túlep ushty.
